2010, ഏപ്രിൽ 27, ചൊവ്വാഴ്ച

അമേരിക്കന്‍ വിസാപരീക്ഷണം 5

വളരെയധികം ഓര്‍മകള്‍ ഉറങ്ങുന്ന ചെന്നൈ നഗരം.ഓ എനിക്ക് വയ്യ ഞാന്‍ ഒരു സാഹിത്യകാരനായി എന്ന് തോന്നുന്നു.എന്താ ആ പ്രയോഗം.പഴയ പോലെയല്ല.വല്ലാതെ മാറി.ചില്ലിട്ട സബ് വേകളും ഓവര്‍ ബ്രിഡ്ജുകളും.ബസ്സുകള്‍ ഒട്ടുമുക്കാലും വോള്‍വോ.പഴയ അഡയാര്‍ to  വില്ലിവാക്കം ബസ് 47ഉം 147ഉം എല്ലാം ദാവണിയില്‍ നിന്നും ജീന്‍സിലേക്ക് വന്ന പോലെ. ആകെ മൊത്തത്തില്‍ ഒരു നല്ല ലുക്ക്.

ടാക്സി വിളിക്കണോ വേണ്ടയോ? ഇമ്മാതിരി വോള്‍വോ ബസ്സുകള്‍ ഉള്ളപ്പോള്‍ എന്തിന് ടാസ്കി.കിട്ടിയ വണ്ടിയില്‍ തന്നെ ചാടിക്കേറി. നേരെ ജെമിനി ഓവര്‍ ബ്രിഡ്ജ്.

എ.സി ഹോട്ടല്‍ എന്ന് പറഞ്ഞാല്‍ എ.സി ഹോട്ടല്‍ അത്രതന്നെ.നമ്മുടെ നാട്ടിലെ പട്ടിക്കൂട് ഇതിലും വലിപ്പമുണ്ടാകും.പക്ഷേ റെന്‍റ് നോക്കുകയാണെങ്കില്‍ അടിപൊളി.കൊടുക്കുന്ന കാശിനുള്ളത് ഉണ്ട്.പിന്നെ നമ്മള്‍ ഇവിടെ സുഖവാസത്തിന് വന്നതല്ലലോ.ഒത്താല്‍ ഒരു വിസയെടുക്കണം പോണം അത്രതന്നെ.കിട്ടിയാല്‍ ഊട്ടി അല്ലെങ്കില്‍ ചെന്നൈ.

അങ്ങനെ എല്ലാം കഴിഞ്ഞപ്പോള്‍ 7 മണി.ഒന്ന്‍ ഉറങ്ങാനുള്ള സ്കോപ്പ് ഉണ്ട്.പത്ത് മണിക്കാണ് ഇന്‍റര്‍വ്യു.കോണ്‍സുലേറ്റ് ആണെങ്കിലോ വിളിച്ചാല്‍ വിളി കേള്‍ക്കാവുന്ന ദൂരത്തും.15 mins മുന്‍പാന് റിപോര്‍ട്ട് ചെയ്യേണ്ടത്.നാട്ടില്‍ നിന്നും കിട്ടിയ ഉപദേശമനുസരിച്ച് ഒരു ഒരു മണിക്കൂര്‍ മുന്‍പെങ്കിലും അവിടെ ചെല്ലണം.പക്ഷേ ഇപ്പോള്‍ അമേരിക്കയിലേക്കൊക്കെ ആര് പോകാനാ?മൊത്തം മാന്ദ്യമല്ലേ? എച്ച്1ബി തന്നെ ഫില്‍ ആയില്ല എന്നാണ് കേട്ടത്.അതുകൊണ്ട് ഒരു ഒന്‍പത് മണിക്ക് എണീറ്റാ കാര്യം നടക്കും.പണ്ടേ ഉറങ്ങാന്‍ കിട്ടുന്ന ഒരു അവസരവും പാഴാക്കാത്ത ശീലം ഉള്ളതുകൊണ്ട് തീരുമാനമെടുക്കാന്‍ ഒരു താമസവും ഉണ്ടായില്ല.

എന്‍റമ്മോ മണി. 9:30.പതിവുപോലെ അലാരം അടിച്ചപ്പോള്‍ ഭംഗിയായി ഓഫ് ചെയ്തു കിടന്നുറങ്ങി.അതുകൊണ്ട് 9 മണി എന്ന ടാര്‍ഗെറ്റ് മിസ്സ് ആയി.ഇനിയിപ്പോള്‍ പഴയത് പോലെ ടോം ആന്‍ഡ് ജെറി കളിക്കേണ്ടിവരും.അതായത് ടോമിന്റെ വായില്‍ നിന്നും ഫുഡ് അടിച്ചു മാറ്റുന്ന ജെറിയുടെ അതേ സ്പീഡ്.

പ്രഭാത കര്‍മ്മങ്ങള്‍ എല്ലാം കഴിഞ്ഞു കയ്യില്‍ കിട്ടിയ കടലാസുകളെല്ലാം ബാഗില്‍ പെറുക്കിയെടുത്ത് ഓടുന്ന സമയത്ത് ക്ലോക്കിന്‍റെ ചെറിയ സൂചി പത്തിലും വലുത് ഏകദേശം 12ലും.റോഡിന്‍റെ അപ്പുറത്താണ് കോണ്‍സുലേറ്റ്.റോഡിന്‍റെ നടുക്കാണെങ്കില്‍ ഒരു വേലിയും.പണ്ടായിരുന്നെങ്കില്‍ ചാടി കടന്നെന്നേ.പക്ഷേ ഇപ്പോള്‍ സ്റ്റൈല്‍ മാറിയില്ലേ? ഇനിയിപ്പോള്‍ അവന്‍മാര്‍ ഇതെല്ലാം വല്ല ക്യാമറ വച്ച് കാണുന്നുണ്ടെങ്കിലോ? ആ പേര് പറഞ്ഞു വിസ കിട്ടാതെ വന്നാല്‍? ഛേ. ആദ്യമായി വേലിചാടിയത്തിന്‍റെ പേരില്‍ വിസ കിട്ടിയില്ല എന്ന ഗിന്നസ് റിക്കോര്‍ഡ് വെറുതെ എന്തിനാ വാങ്ങിക്കുന്നേ?

അങ്ങനെ ആദ്യമായി ചുറ്റിക്കറങ്ങി ക്രോസ്സ് ചെയ്തു.എന്‍റമ്മച്ചി അത്യാവശ്യം വലിപ്പമുള്ള ഒരു ക്യൂ.നാട്ടുനടപ്പനുസരിച്ച് ആ സെക്യൂരിറ്റി ചേട്ടനെ സോപ്പിട്ടാല്‍ കാര്യം നടക്കുവായിരിക്കും.പത്തോ പതിനഞ്ചോ പേര് മാത്രമുള്ള ആ ക്യൂ വിട്ട് അങ്ങനെ ഞാന്‍ സെക്യൂരിറ്റി ചേട്ടനെ മണിയടിക്കാന്‍ പോയി.(ആദ്യത്തെ പണി പാളല്‍)

ബോസ് വണക്കം ബോസ്.

ബോസ് എന്നത് ചെന്നെയില്‍ സാധാരണ വിളിക്കുന്ന അണ്ണാ എന്നതിനേക്കാള്‍ എഫെക്ട് ഉള്ള വിളിയാണ്.

ഉം.

1o മണിക്ക് താന്‍ ഇന്‍റര്‍വ്യു.ബസ് കൊഞ്ചം ലേറ്റ് ആച്ച്.അതിനാലേ നാന്‍ ലേറ്റാച്ച്.

ജാവോ ജാവോ.. ക്യൂ മേം ഘടോ...

ഓഹോ അപ്പോള്‍ അണ്ണന്,‍ അണ്ണന്‍ അല്ല അല്ലേ.ചപ്പാത്തി കഴിച്ചിട്ട് കുറച്ചു കാലം ആയതുകൊണ്ട് ഹിന്ദി അങ്ങ് വരുന്നില്ല.എന്നാലും വരുന്ന ഹിന്ദി വച്ച് അഡ്ജസ്റ്റ് ചെയ്യാം.

മേരാ ബസ് ലേറ്റ് ഹോ...

തുംകോ സമജ് മേം നഹി ആത്താ. ക്യൂ മേം ഘടോ.

ഇടത്ത് കയ്യിലുള്ള തോക്ക് വലതു കയ്യിലേക്ക് മാറ്റികൊണ്ടാണ് ഇപ്പ്രാവശ്യം പറഞ്ഞത്.കയ് കഴച്ചപ്പോള്‍ മാറ്റിപ്പിടിച്ചതായിരിക്കും.എന്തായാലും വെറുതെ എന്തിനാ അയാളുടെ ഉന്നം പരീക്ഷിക്കുന്നത്?ക്യൂ തന്നെ ശരണം.അങ്ങനെ പോകുന്ന വഴിക്ക് ഇടത്ത് സെഡില്‍ അതാ ഒരു കിളിവാതിലില്‍ ഒരു തരുണീമണി.അവിടേയും ഒന്ന് ചോദിച്ചു കളയാം.

1o o clock? Thats not a problem.

അതേടി നിനക്കൊന്നും ഒരു പ്രശ്നവുമില്ല.എന്റെ വിസ അല്ലേ പോകുന്നത്.ക്യൂവില്‍  ചെന്നു നോക്കിയപ്പോള്‍ പഴയ പതിനഞ്ചിന് പകരം 20.കയറി നിന്നു.വിചാരിക്കുന്ന പോലെയല്ല.നല്ല മൂവ്മെന്‍റ്.ഒരു 10 ആളുകള്‍ മാത്രം എന്‍റെ മുന്‍പിലുള്ളപ്പോള്‍ വെറുതെ ഒന്ന് തിരിഞ്ഞു നോക്കി.ദേ വരുന്നു ഒരു TCS.കണ്ടാലെ അറിയാം ഒരു അച്ചായത്തി ആണെന്ന്.ഇതെന്താ ക്യൂവില്‍ നില്‍ക്കാതെ അങ്ങ് പോകുന്നേ? ദേ അമ്പലത്തില്‍ ചെരിപ്പ് സൂക്ഷിക്കുന്നത് പോലത്തെ ഒരു സെറ്റപ്പ്.ബാഗ് അവിടെ കൊടുത്ത് ടോക്കെന്‍ വാങ്ങുന്നു.ശരിയാ ഇതില്‍ നില്‍ക്കുന്നവരുടെ കയ്യിലൊന്നും ബാഗുകള്‍ ഇല്ല.വീണ്ടും പണി പാളി.

എന്‍റെ വെപ്പ്രാളം കണ്ടത് കൊണ്ട് ആകാം മുന്നില്‍ നില്‍ക്കുന്ന ചേട്ടന്‍ പറഞ്ഞു.ബാഗും കൊണ്ട് ഉള്ളില്‍ കടക്കാന്‍ പറ്റില്ല മോനേ.അവിടെ കൊടുത്ത് ഏല്‍പ്പിച്ചേര് കൂടെ പത്ത് രൂപായും.യേവന്‍ ഇതോന്ന് മുന്‍പേ മൊഴിഞ്ഞിരുന്നെങ്കില്‍??

അങ്ങനെ ബാഗ് കൊടുക്കാന്‍ ചെന്നപ്പോള്‍ അവിടെ ഒരു ക്യൂ.പക്ഷേ 3 പേര് മാത്രം.അവനെന്‍റെ പാസ്പോര്‍ട് കാണണം.ഇന്‍റര്‍വ്യു ലെറ്റര്‍ കാണണം.എന്നാലേ ബാഗ് എടുക്കൂ.

അവസാനം ക്യൂ വില്‍ വന്നു നിന്നപ്പോള്‍ 15 പേര്.ആരുടെയോ തിയറി വച്ചോ ബിTech നാലാം സെമ്മില്‍ പഠിച്ച Queuing equations വച്ചോ ഒക്കെ ക്യൂ നീങ്ങുന്നുണ്ട്.അങ്ങനെ എന്‍റെ ഊഴം എത്തി സമയം 10:30.സെക്യൂരിറ്റി കടത്തി വിടുമോ എന്തോ? ഇനി വിട്ടില്ലെങ്കില്‍ വല്ല കള്ള സീലുമുണ്ടാക്കി rejected എന്ന് മുദ്ര കുത്തി നാട്ടില്‍ പോകാം.അല്ലാതെ എന്തു ചെയ്യാന്‍ അല്ലേ?വരുന്നിടത്ത് വച്ച് കാണാം.

2010, ഏപ്രിൽ 25, ഞായറാഴ്‌ച

നൂഡില്‍സ് കഞ്ഞി

നൂഡില്‍സ് ഉണ്ടാക്കാന്‍ ഒരു ശ്രമം നടത്തിയതാ.പക്ഷേ കഞ്ഞി പോലെയായി.

പിന്നെ ചെമ്മീന്‍ ചമ്മന്തിപൊടി വിതറി അങ്ങ് അഡ്ജസ്റ്റ് ചെയ്തു.ഓണ്‍സൈറ്റ് അല്ലേ.. എന്തൊക്കെ സഹിക്കണം.:-)

 

പഴയ നിക്കോണ്‍ ക്യാമറ പോലെയല്ല.ഈ ക്യാനന്‍ അത്ര ക്ലാരിറ്റി വരുന്നില്ല.

2010, ഏപ്രിൽ 19, തിങ്കളാഴ്‌ച

അമേരിക്കന്‍ വിസാപരീക്ഷണം 4

കഥ ഇതുവരെ

അത്രയ്ക്ക് നിര്‍ബന്ധമുള്ളവര്‍ താഴെ കൊടുത്തിരിക്കുന്ന ലിങ്കുകള്‍ നോക്കി വായിച്ചു മനസിലാക്കുക.

അമേരിക്കന്‍ വിസാപരീക്ഷണം 1
അമേരിക്കന്‍ വിസാപരീക്ഷണം 2
അമേരിക്കന്‍ വിസാപരീക്ഷണം 3

 

10 മണിക്കാണ് വിസ ഇന്‍റര്‍വ്യു.ചുമ്മാ ടിക്കറ്റെടുത്ത് ചാടിക്കേറി പോയാല്‍ മാത്രം മതിയോ? അവിടെപോയാല്‍ എവിടെ താമസിക്കും?എങ്ങിനെ പോകും?തുടങ്ങിയ സംശയങ്ങള്‍ നിങ്ങള്‍ക്കുണ്ടാകാം.പക്ഷെ ഒന്നുകൊണ്ടും പേടിക്കേണ്ട.ഒരു എ.സി ഹോട്ടല്‍ തന്നെ കണ്ടു വച്ചിട്ടുണ്ട് .അതും കോണ്‍സുലേറ്റിന്‍റെ തൊട്ടടുത്ത് തന്നെ.കഴിഞ്ഞപ്രാവശ്യം അവന്‍മാര്‍ പോയപ്പോള്‍ താമസിച്ചതും അവിടെത്തന്നെ.ഈ കമ്പനിയുടെ ഓരോ സ്റ്റാന്‍ഡേര്‍ഡുകളേ.എ.സി കോച്ച് ,എ.സി റൂം.എനിക്ക് വയ്യ.

അങ്ങനെ നമ്മുടെ ആലപ്പി ഒരു അര മണിക്കൂര്‍ വൈകി നോര്‍ത്ത് സ്റ്റേഷനില്‍ വന്നു നിന്നു.അരമണിക്കൂര്‍ വൈകിയില്ലെങ്കില്‍ പിന്നെ എന്തു ആലപ്പി അല്ലേ.പക്ഷെ എനിക്ക് ഫീലിങ്സ് ആയത് അതോന്നുമല്ല.സാധാരണ ബോഗിയില്‍ പതിക്കുന്ന ആ റിസര്‍വേഷന്‍ ലിസ്റ്റ് കാണുന്നില്ല..പ്രോജെക്റ്റിന്‍റെ പേര് മാത്രം തന്ന്‍ കോഡ് എഴുതാന്‍ പറഞ്ഞ ഒരു അവസ്ഥ.ഇനിയിപ്പോള്‍ എല്ലാം ഞാന്‍ തന്നെ കണ്ടു പിടിക്കണം.അങ്ങനെ വലതു കാലുവച്ച് ഞാന്‍ ആ ബോഗിയിലേക്ക് കയറി.

3rd എ.സി ഇപ്പോഴും 3rd എ.സി തന്നെ.ഒരുത്തനും മിണ്ടുന്നില്ല.എല്ലാവരും ഓരോ ബുക്കും പിടിച്ചുകൊണ്ട് നാളെയാണ് പി.എസ്.സി ടെസ്റ്റ് എന്ന മട്ടില്‍ ഇരിക്കുന്നു.ചിലഅവന്‍മാര്‍ ലാപ്ടോപ്പ് തുറന്നു വച്ച് ചുമ്മാ വാള്‍പേപ്പര്‍ മാറ്റി കളിക്കുന്നു.സ്ക്രീന്‍സേവര്‍ നോക്കുന്നു.ഇതെന്താണെന്നറിയാത്തവര്‍ ഇവന്‍ ഭയങ്കരനാണ് എന്ന മട്ടില്‍ നോക്കികൊണ്ടിരിക്കുന്നു.ലാപ്ടോപ്പ് ഇപ്പോഴേ തുറക്കണോ?ഏയ് വേണ്ട.അറിയാവുന്നവര്‍ വല്ലവരുമുണ്ടെങ്കില്‍ വെറുതെ ജാടയാണെന്നുവിചാരിക്കും.ആരും ഇങ്ങോട്ടുകയറി മുട്ടുകയുമില്ല. അങ്ങനെ ഞാനെന്‍റെ സീറ്റില്‍ വന്നിരുന്നു.തികച്ചും ഒരു മരുഭൂമി.

അതായത്.ആറുപേര്‍ക്കിരിക്കാവുന്ന സെഡില്‍ ഞാനും ഒരു വല്യപ്പനും.പുള്ളി ഉറക്കത്തിലാണ്.മറ്റേ സെഡില്‍ രണ്ട് മദ്ധ്യവയസ്കര്‍ ഏതോ കമ്പനിആവശ്യത്തിന് ചെന്നെയില്‍ പോകുന്നവരാണ്.ടോയിലേറ്റില്‍ പോവുകയാണെന്ന വ്യാജേന ഒന്ന് കറങ്ങി.കൊള്ളാം.മറ്റുള്ള കാബിനുകളെല്ലാം ഏകദേശം ഫുള്ള്.ഇനി ആരെങ്കിലും കയറിയാല്‍ ഇവിടെ മാത്രമേ സീറ്റുള്ളൂ.പ്രൈസ് ദ ലോര്‍ഡ്.

അങ്ങനെ ആലുവ.ഒരു അന്‍പത് റേഞ്ചിലുള്ള ഒരു കപ്പിള്‍സ് കയറി.കണ്ടാലേയറിയാം അവര്‍ അവിടെ വര്‍ക്ക് ചെയ്യുന്നവരല്ല.എന്തോ കാര്യത്തിന് പോകുന്നതാണ്.ഇവര്‍ക്ക് ഇവരുടെ പിള്ളാരെയും കൂടെ കൂട്ടിക്കൂടെ..രണ്ട് സീറ്റ് ബാക്കിയുണ്ടല്ലോ.അല്ല പിന്നെ.ദാന്‍ഡെ ഒരു ഉയരമില്ലാത്ത മനുഷ്യന്‍ രണ്ട് പ്രാവശ്യമായി നമ്മുടെ കാബിനില്‍ വന്നു വെറുതെ നോക്കിപോകുന്നു.തല്‍ക്കാലം നമുക്കയാളെ കുട്ടിമനുഷ്യന്‍ എന്ന് വിളിക്കാം.

അങ്ങനെ ടി.ടി. ആര്‍ വന്നു.എന്‍റെ ടിക്കറ്റ് നോക്കിയത്തിനുശേഷം ആ കപ്പിള്‍സ് കൊടുത്ത ടിക്കറ്റ് നോക്കി ടിടി. പറഞ്ഞു.ഈ ബാക്കി കിടക്കുന്ന സീറ്റ് നിങ്ങള്‍ ബുക്ക് ചെയ്തിട്ട് ക്യാന്‍സല്‍ ചെയ്തല്ലേ? അതേ മോള്‍ കുറച്ചു അത്യാവശ്യം ഉള്ളതുകൊണ്ട് ഇന്നലെ തന്നെ പോയി.അപ്പോള്‍ വിചാരിച്ച പോലെ തന്നെ.വായില്‍നോട്ട യോഗം ആയിട്ടില്ല.

അങ്കമാലി...അകത്തോ ആരും ഇല്ല എന്നാല്‍ ഇനി പുറത്തെങ്കിലും വായില്‍ നോക്കാം.അങ്ങനെ വാതില്‍ക്കല്‍ ചെന്നു നിന്നു.യെവെടെ സഹാറ മരുഭൂമിയില്‍ ഇതിലും കൂടുതല്‍ മരുപ്പച്ചകളും വെള്ളവും കാണും.ഇവിടെ ഒന്നുമില്ല.ട്രയിന്‍ നീങ്ങി തുടങ്ങി.ദേ വരുന്നു രണ്ട് കിളികള്‍.അതിലൊരുത്തിയെ കണ്ടാലേയറിയം അ ഉയരം... എനിക്കുവേണ്ടി പറഞ്ഞുവച്ചിട്ടുള്ളതാ.വെറുതെ പുറത്ത് നിന്ന് വായില്‍ നോക്കി ഇമേജ് ഉണ്ടാക്കേണ്ട. അകത്തിരിക്കാം.വേറെ എവിടെ പോകാന്‍.ഇനി ഈ കംപാര്‍ട്ട്മെന്‍റില്‍ എന്‍റെ കാബിനില്‍ മാത്രമല്ലേ സ്ഥലമുള്ളൂ.

അതേ ഞങ്ങളിപ്പോള്‍ ട്രൈയിനില്‍ ചെന്നൈയിലേക്ക് ചിന്നുമോളുടെ convocation കാണാന്‍ വേണ്ടി പോയികൊണ്ടിരിക്കുവാ.അവള് ഇന്നലെയേ പോയി.റിഹേഴ്സല്‍ ഉണ്ട് പോലും.കാപ്പിള്‍സിലുള്ള ചേച്ചി ആരോടോ ഫോണില്‍ പറയുന്നു.വെറുതെ എന്തിനാ ചേച്ചി ശവത്തില്‍ കുത്തുന്നെ?നിങ്ങള്‍ എങ്ങോട്ടെങ്കിലും വരികയെ പോവുകയോ ചെയ്യ്.വിളിച്ചു പറയേണ്ട വല്ല കാര്യവുമുണ്ടോ?

കുറച്ചു മുന്‍പ് കണ്ട കുട്ടിമനുഷ്യനല്ലേ ദേ ഇപ്പോള്‍ ഫാമിലിയായിട്ട് വരുന്നത്?ഇവര്‍ക്കേവിടെയാ സീറ്റ്?ഇനി ക്യാന്‍സല്‍ ചെയ്ത സീറ്റ് പിടിക്കാന്‍ വരുന്നതാകുമോ?ഏയ് അപ്പോള്‍ അങ്കമാലിയില്‍ നിന്നും കയറിയ പിള്ളേര്‍ എവിടെ ഇരിക്കും. എന്തെങ്കിലുമാകട്ടെ. ഒരു മോളുണ്ട്.സ്റ്റാര്‍ട്ട് സ്കാനര്‍...ആക്ഷന്‍...

കട്ട്...ഛേ.ഒരു പച്ച പരിഷ്കാരി.അവളുടെയൊരു ജീന്‍സും t ഷര്‍ട്ടും.ഒരു മുടിഞ്ഞ ഇംഗ്ലീഷും.ഏയ് നമുക്ക് ശരിയാവില്ല.പേര് ലിസ.അങ്ങനെ ആ പ്രതീക്ഷയും പോയി.

വെയര്‍ ആര്‍ യു സ്റ്റെയിങ്? ഐ ആം സ്റ്റെയിങ് അറ്റ് Thiruvanmiyur.ഒരു കിളിയുടെ മറുപടിയല്ലേ ആ കേട്ടത്?അതേ.അങ്കമാലിയില്‍ നിന്നും കയറി യ അതേ കിളി.അപ്പുറത്തെ കാബിനില്‍ നിന്നും.അവിടെ മസിലും പെരുപ്പിച്ച് ലാപ്ടോപ്പും തുറന്നു വച്ചിരിക്കുന്നവനോടുതന്നെ.എടീ.എന്നാലും എന്നോടീ ചതി വേണ്ടായിരുന്നു.

ഞാന്‍ നോക്കിയപ്പോള്‍ കറക്റ്റ് 6 പേരവിടെ ഇരിപ്പുണ്ടായിരുന്നല്ലോ.അപ്പോള്‍ ഇതെങ്ങിനെ സംഭവിച്ചു?ആ പോട്ട് എന്തായാലും കാലാവസ്ഥ വളരെ പ്രതികൂലമാണ്.മൂടി പുതച്ചു കിടന്നുറങ്ങിയേക്കാം.അങ്ങനെ നമ്മുടെ അപ്പര്‍ ബെര്‍ത്തിലേക്ക് ചുരുണ്ടു വിത്ത് 2 അലാംസ്  ഇന്‍ ആക്ഷന്‍ അറ്റ് 5:45 .

ഓട്ടഹപ്പാല്‍.. ഓട്ടഹപ്പാല്‍...ദൈവമേ ആരാ ഈ രാത്രിയില്‍ ഒട്ടകപാല് ചോദിക്കുന്നത്?വല്ല അറബിയും കയറിയിട്ടുണ്ടോ?മാന്ദ്യം കാരണം അറബികളൊക്കെ ട്രെയിന്‍ യാത്രയാക്കിയോ? ഒട്ടകപാലല്ല മോളേ.ഒറ്റപ്പാലം.ശരിക്ക് വായിക്കൂ.ഓഹോ.കുട്ടിമനുഷ്യന്‍ മോളേ മലയാളം പഠിപ്പിക്കുവാ...അതും മനുഷ്യന്‍ ഇവിടെ ഡെസ്പ് അടിച്ച് ഉറങ്ങുന്ന നേരത്ത്.അവളുടെ അമ്മേടെ....വീട്ടില്‍ നിന്നിട്ടാണെന്ന് തോന്നുന്നു ആകുട്ടി മലയാളം പഠിച്ചത്.ഹും..

6:05 am.ആലപ്പി ചെന്നെയില്‍ വന്നു നിന്നു.ഇപ്പോള്‍ ചെന്നെയില്‍ ഇറങ്ങുന്നത് ആ പഴയ ജോലി അന്വേഷിച്ച് വന്ന പോലെയല്ല.എ.സി കോച്ച്.കയ്യില്‍ ലാപ്പ്.ഓ എനിക്ക് വയ്യ.ഇത്തവണ ഒന്ന് തകര്‍ക്കണം.

2010, ഏപ്രിൽ 14, ബുധനാഴ്‌ച

ന്യൂ ജെനെറഷന്‍ ഹീറോ ഈസ്‌ ബാക്ക്

കോഴിക്കോട് വീടായതുകൊണ്ട്‌ മാത്രം ബാക്ക് എന്നു പേര് വീണ ഒരുത്തനെപറ്റി ഒരു പഴയ പോസ്റ്റില്‍ പറഞ്ഞിരുന്നു.പുള്ളിക്കാരന്‍ താന്തോന്നി എന്ന പടം റിലീസ് ആയതോടുകൂടി ശരിക്കും ഹീറോ ആയി.

കഥ ഇങ്ങെനെയാണ്.ഒരുത്തന്‍ ആ പടം കണ്ടിട്ട് വരുന്നു.പടത്തിനെ പറ്റി പറയുന്നതിനുമുന്പേ ബാക്കിനെ ഒന്ന് അഭിനന്ദിച്ചു.നീയാണെടാ ബാക്കെ ന്യൂ ജെനെറേഷന്‍ ഹീറോ.ഒന്നും മനസിലാകാതെ നിന്ന ബാക്കിനു താഴെ കൊടുത്തിട്ടുള്ള ഫോട്ടോ കണ്ടപ്പോള്‍ എല്ലാം പിടികിട്ടി.



2010, ഏപ്രിൽ 11, ഞായറാഴ്‌ച

കടാപ്പുറത്തെ സൗന്ദര്യം

എടാ നീ അറിഞ്ഞോ നമ്മുടെ ആ ആന്റിയുടെ മോന്‍ ഒരു അരയത്തി പെണ്ണിനെ കല്യാണം കഴിക്കാന്‍ പോകുന്നു.
ഇത് കേട്ട നിധിന്‍: അതിനെന്താ കുഴപ്പം.കടപ്പുറത്തുള്ള പെണ്ണുങ്ങളെല്ലാം നല്ല സുന്ദരി പെണ്ണുങ്ങളല്ലേ.ഉദാഹരണമായി ചെമ്മീനിലെ ഷീല സുന്ദരിയല്ലേ,പിന്നെ അമരത്തിലെ മാതു....
 

2010, ഏപ്രിൽ 9, വെള്ളിയാഴ്‌ച

അമേരിക്കന്‍ വിസാപരീക്ഷണം 3

Recap /കഥ ഇതുവരെ...

ആദ്യത്തെ വിസാപരീക്ഷണം പാളി.വീണ്ടും പോകാന്‍ അനുമതി കിട്ടി.

തുടര്‍ന്നു വായിക്കുക.

 

പണ്ട് സ്കൂളില്‍ പഠിക്കുമ്പോള്‍ ചോദിക്കുന്ന ഒരു കുസൃതിച്ചോദ്യമുണ്ട്.ഒരു കിളി പറന്നുകൊണ്ട് മുട്ടയിട്ടു മുട്ട പൊട്ടിയില്ല എന്തുകൊണ്ട്? അറിയിലെങ്കില്‍ പറയാം.അതിന്‍റെ ഭാഗ്യം കൊണ്ട്.വീണ്ടും പറന്നുകൊണ്ട് മുട്ടയിട്ടപ്പോഴും പൊട്ടിയില്ല എന്തുകൊണ്ട്? ഉത്തരം എക്സ്പീരിയന്‍സ് കൊണ്ട്..

അങ്ങനെ നോക്കുകയാണെങ്കില്‍ എനിക്ക് എക്സ്പീരിയന്‍സ് ആയി ഈ വിസയെടുക്കലില്‍.ആ ഒരു അഹങ്കാരത്തോടുകൂടി അഡ്മിന്‍റെ കൈയ്യില്‍ നിന്നും പൈസയും വാങ്ങി എച്ച്.ഡി.എഫ്.സി. ബാങ്കില്‍ പോയി.പെട്ടെന്നുതന്നെ റെസീപ്റ്റ് വാങ്ങി.സൈറ്റില്‍ കയറി പിന്നെയെങ്ങാനും അപ്പോയിന്‍റ്മെന്‍റ് എടുക്കാം.നമ്മള്‍ എക്സ്പേര്‍ട് അല്ലേ ഇതെല്ലാം ഫില്‍ ചെയ്യാന്‍.

അങ്ങനെ രാഹുകാലം,യമകണ്ടകാലം,കലികാലം ഒക്കെനോക്കി ഫില്ലൂചെയ്യാനിരുന്നു.സൈറ്റുകണ്ടതും എന്‍റെ ഉള്ളില്‍ ഒരു ഇടിവെട്ടി.ആനയും ആടും എന്നൊക്കെ പറഞ്ഞാല്‍ ഒരു ചെറിയ സാമ്യമെങ്കിലും കാണും.കുറഞ്ഞത് രണ്ടിനും നാലുകാലാണല്ലോ..പോരാത്തത്തിന് രണ്ടും വെജിറ്റേറിയന്‍സ്.ഇതൊരുമാതിരി ആനയും അട്ടയും പോലെ.പണ്ടുഞങ്ങള്‍ കണ്ട സൈറ്റുമായി ഒരു ബന്ധവുമില്ല.പണ്ടു ഫില്‍ ചെയ്തത് ഫോം 156ഉം 157നും ആയിരുന്നു.ദാന്‍ഡെ ഇവിടെ കിടക്കുന്നു ഫോം 160.കര്‍ത്താവേ പണി പാളിയെന്നാ തോന്നുന്നേ.

ആദ്യം ഫില്‍ ചെയ്തപ്പോള്‍ കൂടെ എച്ച്.ആര്‍ ഉണ്ടായിരുന്നു.അന്ന് ഞങ്ങള്‍ നാലുപേരുള്ളതുകൊണ്ട് കുഴപ്പമില്ല.ഇപ്പോഴെങ്ങാനും ഞാന്‍ എച്ച്.ആറിനെയും കൂട്ടി ഒരു മുറിയിലിരുന്നു ഫില്‍ ചെയ്താല്‍ പണിപാളും.ചുമ്മാ ഓരോ കഥകള്‍ ഇറങ്ങും.അല്ലെങ്കില്‍ത്തന്നെ നല്ല ഇമേജാണ്.ഇനി അത് വെറുതെ കൂടുതലാക്കി ഭാവി കോഞ്ഞാട്ടയാക്കേണ്ട.എന്നെപ്പോലെ ഗ്ലാമറുള്ള ഒരു ബാച്ചിലറുടെ ഓരോ പ്രശ്നങ്ങളേ...അങ്ങനെ വരുന്നത് വരട്ടെ എന്ന് തീരുമാനിച്ചു ഞാന്‍ ഒറ്റക്ക് ഫില്ലിങ് തുടങ്ങി.

ആദ്യ പാര ഫോട്ടോ ആയിരുന്നു.പണ്ടായിരുന്നെങ്കില്‍ ഫോട്ടോ കൊണ്ട് പോയാല്‍ മതിയായിരുന്നു.ഇതിപ്പോള്‍ അതില്‍ അപ്പ് ലോഡുചെയ്യണം.അതും അവന്‍മാരുടെ ഒരു ഫോര്‍മാറ്റില്‍.എന്തു ചെയ്യും എന്നാലോചിച്ചുനിന്നപ്പോഴാണ് അടുത്തിരിക്കുന്ന പ്രവീണ്‍ നായരുടെ പുതിയ മൊബൈല്‍ കണ്ടത്.പിന്നെ ഒന്നും ആലോചിച്ചില്ല ഡിസൈനര്‍ രാജീവിനേയും വിളിച്ചു അടുത്ത കോണ്‍ഫറന്‍സ് റൂമില്‍ കയറി.എന്‍റെ ഗ്ലാമറും പിന്നെ രാജീവിന്‍റെ കഴിവും ഒത്തുചേര്‍ന്നപ്പോള്‍ ഒരു കിടിലന്‍ ഫോട്ടോ.അവന്‍മാരു പറഞ്ഞ അതേ രണ്ടിഞ്ച് നീളത്തിലും രണ്ടിഞ്ച് വീതിയിലും.

അങ്ങനെ അതു കഴിഞ്ഞപ്പോള്‍ ദേ വരുന്നു അടുത്ത പാര.ഈ കുന്തത്തില്‍ ലോഗിന്‍ ഇല്ല.നമ്മള്‍ ഓരോ ഫോമുകള്‍ ഫില്‍ ചെയ്തു അവസാനം അതു ഡിജിറ്റല്‍ സിഗ്നേചര്‍ ഉപയോഗിച്ച് ഒരു ബാര്‍കോട് ഉണ്ടാക്കണം.ഈ ബാര്‍കോഡുപയോഗിച്ച് വേണം അപ്പോയിന്‍റ്മെന്‍റ് എടുക്കാന്‍.ഫില്ലുചെയ്യുന്നതിന്റെ  ഇടയില്‍ ഒരു ചായ കുടിക്കാന്‍ പോയാല്‍ അതു ടൈം ഔട്ട് ആകും.വിസ പിന്നെയും എടുക്കാം.പക്ഷെ  ഇപ്പോള്‍ കുടിക്കേണ്ട ചായ ഇപ്പോള്‍ തന്നെ കുടിക്കണമല്ലോ എന്ന ഒരു തത്വം വച്ച് രണ്ട് തവണ ചായ കുടിക്കാന്‍ പോയി രണ്ട് തവണയും അവന്‍ ടൈം ഔട്ട് ആയി.ഒരു കാര്യം ഉറപ്പിച്ചു.ഏതോ വിവരമുള്ളവന്‍ ചെയ്ത സൈറ്റുതന്നെ.

കുന്തം പോയാല്‍ ഗൂഗിളിലും തപ്പണം എന്ന പുതിയ പഴഞ്ചൊല്ലനുസരിച്ച് അവിടെയും ഒന്ന് തപ്പി.ദാണ്‍‍ഡെ കിടക്കുന്നു ഒരു കിടിലന്‍ എന്നുപറയാന്‍പറ്റില്ല എന്നാലും കുഴപ്പമില്ലാത്ത ഒരു വഴി.ഓരോ പേജും കഴിയുമ്പോള്‍ ആ അപ്പ്ളിക്കേഷന്‍ ഒരു പ്രത്യേക ഫോര്‍മാറ്റില്‍ ഡൌണ്‍ലോഡ് ചെയ്യാം.ആ ഡൌണ്‍ലോഡ് ചെയ്ത ഫയല്‍ അപ്പ് ലോഡ് ചെയ്താല്‍ വീണ്ടും വിസ അപ്പ്ളിക്കേഷന്‍ ഫില്‍ ചെയ്യാം.

അങ്ങനെ ആ ഭയങ്കയകണ്ടുപിടുത്തത്തോടുകൂടി കാര്യങ്ങള്‍ വളരെ എളുപ്പമായി.ഫോം 160 കഴിഞ്ഞു..അതു കഴിഞ്ഞപ്പോള്‍ ഒരു ബാര്‍‍കോഡു പതിച്ച ഒരു ഷീറ്റ് കിട്ടി. പിന്നെ ഡേയ്റ്റ് എടുക്കല്‍.അതു അതിലും എളുപ്പം.ചുമ്മാ ആ ബാര്‍കോഡുകൊടുത്താല്‍ മാത്രം മതി.അങ്ങനെ ഡേയ്റ്റ് കിട്ടി.26 മാര്‍ച്ച്.

ദൈവമേ ട്രെയിനില്‍ ടിക്കറ്റുണ്ടോ എന്ന് നോക്കിയില്ലലോ.ഒരു ഓളത്തിനങ്ങുപോയി ഡേയ്റ്റ് എടുക്കുകയും ചെയ്തു.പണ്ടു ജോലിയില്ലാതെ ചെന്നെയില്‍ തെണ്ടിതിരിഞ്ഞു നടന്നപ്പോള്‍ പോയിരുന്നതുപോലെ ചാടിക്കേറി പോകേണ്ടി വരുമോ?ഛെ..ഇനി ഞാനങ്ങനെ പോകാം എന്നുപറഞ്ഞാലും കമ്പനി സമ്മതിക്കുമോ? കമ്പനിക്ക് ഒരു സ്റ്റാന്‍ഡേര്‍ഡു കാണില്ലേ?

വെറുതെ കാടുകയറി ചിന്തിക്കുന്നതെന്തിനാ?ടിക്കറ്റ് ഉണ്ടോ എന്ന് നോക്കിയിട്ടു പോരെ ഈ വക ചിന്തകളെല്ലാം?അങ്ങനെ ഓം ആലപ്പിയാഹ നമഹ എന്ന് പറഞ്ഞുനോക്കിയപ്പോള്‍ ദേ കിടക്കുന്നു 3rd എ.സിയില്‍ വെയിറ്റിങ് ലിസ്റ്റ് 6.ചീളുകേസ്... എന്തായാലും കണ്‍ഫോമാകും.

അങ്ങനെ 24ആം തീയതിയായി.പ്രശ്നങ്ങള്‍ ഒന്നും കാണാനില്ല.പ്രോജക്റ്റ് അതിന്‍റെ വഴിക്ക് തന്നെ പോകുന്നുണ്ട്.ആ ദിവസത്തെ ഓണ്‍സൈറ്റ് ലീഡുമായുള്ള കോളും വലിയ കുഴപ്പമില്ലാതെ അവസാനിച്ചു.എന്തായാലും നാളത്തെ കോളിനെ പേടിക്കേണ്ട കാര്യമില്ല.ട്രെയിന്‍ നാളെ വൈകീട്ട് അഞ്ചരക്കാണ്.അതിന് മുന്‍പ് പുള്ളി വിളിക്കത്തില്ല.

പോകാനുള്ള ദിവസം വന്നപ്പോള്‍ ആദ്യം ചെയ്തത് കമ്പനി മെയില്‍ നോക്കലായിരുന്നു.നോ പ്രോബ്ലംസ്...ഉച്ചക്ക് രണ്ട് മണിയായപ്പോഴേ ഓഫീസില്‍ നിന്നും മുങ്ങി.പിന്നെ പൊങ്ങിയത് ഒരു നാലരമണിക്ക് നോര്‍ത്ത് റെയില്‍വേ സ്റ്റേഷനിലായിരുന്നു എല്ലാ പ്രാവശ്യവും ആലപ്പി എക്സ്പ്രെസില്‍ കയറുമ്പോള്‍ ചൊല്ലുന്ന പ്രാര്‍ഥനയും ചൊല്ലിക്കൊണ്ട്.എനിക്കായി പറഞ്ഞുവച്ചിട്ടുള്ളവളെ ഈ യാത്രയിലെങ്കിലും കാണിച്ച് തരണമേ.ആമ്മേന്‍.അതായത് വായില്‍ നോക്കാന്‍ പരുവത്തില്‍ ഒരു അഞ്ചാറേഴേട്ടോമ്പത് പിള്ളേര്‍ ഞാന്‍ കയറുന്ന ബോഗിയില്‍.അത്രമാത്രം.

2010, ഏപ്രിൽ 2, വെള്ളിയാഴ്‌ച

അമേരിക്കന്‍ വിസാപരീക്ഷണം 2

ഠിം ഠിം...ഞാന്‍ ഇടിഞ്ഞുപൊളിഞ്ഞു വീണു എന്നു കരുതിയവര്‍ക്ക് തെറ്റി.അവിടെ അമ്മയാണെന്നുതോന്നുന്നു ആരോ അലക്കുന്ന ശബ്ദമാണ്.ഓണ്‍സൈറ്റ് തരും എന്നത് നമ്മള്‍ ഇന്നും ഇന്നലേയും കേട്ടുതുടങ്ങിയതല്ലല്ലോ.ഇതും കൂടിച്ചേര്‍ത്ത് മൂന്നാമത്തെ തവണയാണു മിസ്സ് ആകുന്നത്.

അങ്ങനെ തിങ്കളാഴ്ച്ചയായി.വീണ്ടും ഓഫീസിലേക്ക്.വിസയെടുത്തിട്ടു വരാമെടെ എന്നുപറഞ്ഞുപോയവന്‍ വെറുംകൈയ്യോടെ വരുന്നതുകണ്ട് ഓഫീസിലുള്ളവരൊക്കെ ഒരു വല്ലാത്ത നോട്ടം.ഇതെന്താടാ പിണ്ടിപ്പെരുന്നാളിനു ആനയെ എഴുന്നുള്ളിച്ചേക്കുവാണോടാ ഇങ്ങനെ നോക്കാന്‍?

ഇങ്ങനെ ചോദിക്കണം എന്നുണ്ടായിരുന്നു.പിന്നെ വിസയെന്നു കേട്ടിട്ടുണ്ടെന്നല്ലാതെ അതിന്‍റെ ഫോം കണ്ടിട്ടില്ലാത്ത പിള്ളാരല്ലേ ഒരു സൈഡില്‍നിന്നും പണിതുടങ്ങിയാല്‍ പിന്നെ 100ആം ദിവസം ആഘോഷിച്ചിട്ടേ നിറുത്തൂ.എന്തായാലും പണിതുടങ്ങിയേക്കാം.മെയിലുകള്‍ ധാരാളം വന്നിട്ടുണ്ട്.ചെയ്യാനുള്ള പണികളുടെ ഒരു ലിസ്റ്റ് പ്രിന്റ് എടുത്ത് മാനേജരുടെ അടുത്തു പോയേക്കാം .പ്രയോരിറ്റി പുള്ളി തീരുമാനിക്കട്ടെ.

"പേടിക്കേണ്ട കാര്യമൊന്നുമില്ല.വര്‍ക്ക് ക്രിട്ടിക്കല്‍ ആയതുകൊണ്ടാണു വിസക്കു പോകേണ്ടെന്നു പറഞ്ഞത്.ഇതു കഴിഞ്ഞാല്‍ അപ്പോള്‍തന്നെ വിസയെടുക്കാം.ഒരു കുഴപ്പവുമില്ല.അപ്പ്സെറ്റ് ആകേണ്ട യാതൊരു കാര്യമൊന്നുമില്ല." ഛെ...പുള്ളി കൈയ്യിലുള്ള പേപ്പര്‍ കണ്ടു തെറ്റിധരിച്ചു എന്നു തോന്നുന്നു.ഞാനെങ്ങാണ്ട് വിസയെടുക്കാന്‍ പറ്റത്തതുകൊണ്ട് പേപ്പറിടാന്‍ വന്നതാണെന്നു വിചാരിച്ചുകാണും.കഴിഞ്ഞതു കഴിഞ്ഞു.വീണ്ടും സില്‍വര്‍ലൈറ്റ് എന്ന ടെക്നോളജി ഉപയോഗിച്ച് പ്രൊജെക്റ്റുമായി മല്‍പ്പിടുത്തം.

അങ്ങനെ വീണ്ടും കുറെ പ്രൊജെക്റ്റ് റിലീസുകള്‍,ബഗ്ഗുകള്‍...ഇന്ഫൊപാര്‍ക്കില്‍ കുറെപ്പേര്‍ വന്നു.കുറെപ്പേര്‍ പോയി.നോക്കിവച്ചിരുന്ന പല പിള്ളേരും അവരവരുടെ വഴിനോക്കിപ്പോയി.അങ്ങനെയിരിക്കുമ്പോള്‍ ഒരു വ്യാഴാഴ്ച.സാധാരണ വൈകീട്ടാണു മീറ്റിങ്.പക്ഷെ ഇന്നു കാലത്ത് ഒരെണം.മീറ്റിങ്ങിനുമുമ്പ് മെയില്‍ നോക്കിയപ്പോള്‍ ദാണ്ടെ കിടക്കുന്നു ഒരെണ്ണം.കണ്ണുകളെ വിശ്വസിക്കാന്‍ പറ്റില്ല എന്ന പ്രയോഗത്തിന്‍റെ അര്‍ത്ഥം അന്നാണു എനിക്കു ശരിക്കും മനസ്സിലായതു.കയ്യില്‍ ഒന്നു പിച്ചി നോക്കി.സ്വപ്നമല്ല. പ്രൊജെക്റ്റ് കഴിഞ്ഞിരിക്കുന്നു.

തള്ളേ ഞാന്‍ പോലും അറിയാതെ എന്‍റെ പ്രൊജെക്റ്റ് കഴിഞ്ഞെന്ന്.മുന്പു കൊടുത്ത ഏതോ ഒരു റിലീസ് ക്ലൈന്‍റിനു പിടിച്ചുപോലും.വീണ്ടും അടിപൊളി.മസിലുപിടിച്ചുനടത്തം,നേരം വൈകി ഓഫീസില്‍ വരവ്,നേരത്തെ സ്കൂട്ടാകല്‍, അരമണിക്കൂര്‍ നീണ്ട ചായകുടി,ഭക്ഷണം കഴിഞ്ഞുള്ള  വായില്‍നോട്ടം തുടങ്ങിയ നാടന്‍കലകളുമായി കുറച്ചുനാള്‍.അധികം നീണ്ടു നിന്നില്ല.വീണ്ടും വിസയെടുക്കാന്‍ പറഞ്ഞുകൊണ്ട് അഡ്മിന്‍ എത്തി.എന്തായാലും വീണ്ടും  ഒരു വിസാപരീക്ഷണം കൂടി നടത്താന്‍ സമയമായി.