2015, ഡിസംബർ 12, ശനിയാഴ്‌ച

ഓണ്‍ലൈൻ പ്രാർത്ഥന പുസ്തകം - ഓപ്പണ്‍ സോഴ്സ്

ഓണ്‍ലൈൻ പ്രാർത്ഥന പുസ്തകം എന്ന ഒരു പ്രൊജക്റ്റ്‌ ഉണ്ടെന്നു മുൻപത്തെ പല പോസ്റ്റുകളിലും പറഞ്ഞിരുന്നു. ഈ ആഴ്ച അത് ഓപ്പണ്‍ സോഴ്സ് ആക്കി. സോഴ്സ് കോഡ് ലിങ്ക് താഴെ കൊടുത്തിരിക്കുന്നു.

https://github.com/joymon/prayerbook

സംഗതി ജാവ സ്ക്രിപ്റ്റ് ആയതുകൊണ്ട് ആർക്ക് വേണമെങ്കിലും മുൻപും കോഡ് കാണാമായിരുന്നു. പക്ഷെ അവർക്ക് എന്തെങ്കിലും അതിൽ മാറ്റം വരുത്തിയാൽ എളുപ്പത്തിൽ ഒറിജിനൽ അപ്ലിക്കേഷനിൽ ഉൾപ്പെടുത്താൻ പറ്റില്ല. അവർ അത് എനിക്ക് അയച്ചുതന്നു ഞാൻ ചേർക്കണം. ഇവിടെ ഗിറ്റ്ഹബ് എന്ന സോഴ്സ് കോഡ് വയ്ക്കുന്ന സെർവർ ആകുമ്പോൾ, ആർക്കു വേണമെങ്കിലും അതിന്റെ ഒരു കോപ്പിയെടുത്ത് അഥവാ ഫോർക്ക് ചെയ്യുക എന്ന് സാങ്കേതികമായി പറയും അതിൽ മാറ്റം വരുത്തി സെർവറിൽ തന്നെ വയ്ക്കാൻ പറ്റും. എനിക്ക് അന്നേരം ഒരു ബട്ടണ്‍ ക്ലിക്ക് മതി അത് മെർജ് ചെയ്യാൻ.

കേട്ടാൽ തോന്നും ആളുകൾ ഈ അപ്ലിക്കേഷനു വേണ്ടി വർക്ക്‌ ചെയ്യാൻ വരി നിൽക്കുകയാണ് എന്ന്. ഇതുവരെ ആരും അങ്ങനെ വന്നിട്ടില്ല. ആരെങ്കിലും വന്നാൽ ഉപയോഗപ്പെടും.

വീണ്ടും അപ്ലിക്കേഷൻ ലിങ്ക് താഴെ കൊടുക്കുന്നു. ക്ലിക്കിയാൽ അപ്ലിക്കേഷൻ കാണാൻ പറ്റും.

http://joymononline.in/apps/prayerbook/index.html

2015, ഒക്‌ടോബർ 17, ശനിയാഴ്‌ച

മണി ട്രാൻസ്ഫർ - Money transfer

മണി ട്രാൻസ്ഫർ

ഇത് പ്രവാസികൾ ഉണ്ടായകാലം മുതലേ ഉള്ള പ്രശ്നം ആണെന്ന് തോന്നുന്നു. പ്രവാസികൾ എന്ന് പറയുമ്പോൾ ഗൾഫുകാർ മാത്രമല്ല. കേരളത്തിൽ നിന്നും ബോംബെയിലും മദ്രാസിലും പോയി ജോലി ചെയ്തവരും ഇതിൽ ഉൾപ്പെടും. ഇന്ത്യയിൽ തന്നെ ജോലി ചെയ്തിരുന്നവർക്ക് രൂപ തന്നെ ആയതുകൊണ്ട് വലിയ പ്രശ്നം ഉണ്ടായിക്കാണില്ല. പക്ഷെ അപ്പോഴും പോസ്റ്റ്‌ ഓഫീസിൽ മണിഓർഡർ അയക്കുമ്പോൾ കൊടുക്കേണ്ട സംഖ്യ എങ്ങിനെ ഒഴിവാക്കാം എന്ന് ആളുകൾ ചിന്തിച്ചിരിക്കാം. ഗൾഫുകാർക്ക് ആ സംഖ്യ കുറച്ചു കൂടുതൽ പ്ലസ്‌ വിനിമയനിരക്കിൽ കുറവ് കൂടെ ചേർന്നപ്പോൾ കുഴൽ എന്നാ ബദൽ മാർഗം വിജയിച്ചു. കുറച്ചു റിസ്ക് ഉണ്ടെങ്കിലും. പിന്നെയാണ് westernunion എത്തുന്നത് ഗംഭീരപരസ്യങ്ങളും ഒക്കെയായി. അതിനു മുന്പ് ഈ മേഘലയിൽ പരസ്യം എന്നൊരു ഏർപ്പാടെ ഉണ്ടായിരുന്നില്ല.

സംഗതി ഇത് ഇപ്പോൾ ഈ ഇന്റർനെറ്റ്‌ കാലത്ത് ഒരു വലിയ പ്രശ്നം ഒന്നും അല്ല. കാരണം ഇപ്പോൾ കുറെ പേർ പുറത്ത് ജോലി ചെയ്യുന്നു അവർ ഒക്കെ പൈസ അയക്കുന്നുമുണ്ട്. പക്ഷെ ഞാൻ ആദ്യമായി പുറത്ത് അമേരിക്കയിൽ ജോലി കിട്ടി വന്നപ്പോൾ അത് എനിക്ക് ഒരു പ്രശ്നം ആയിരുന്നു. കുറെ വഴികളുണ്ട്. എതെടുക്കണം.

ഗൾഫിൽ ഉള്ള ബന്ധുക്കളോട് ചോദിച്ചാൽ പറയും NRI അക്കൗണ്ട്‌ എടുക്കണം. അതിലേക്ക് ഇട്ടാൽ മതി. നാട്ടിൽ നിന്നും പോരുമ്പോൾ അത് എടുക്കാൻ മറന്നു. ഒരു പക്ഷെ എനിക്ക് എടുക്കാൻ പറ്റുമായിരുന്നു എന്നും തോന്നുന്നില്ല. കാരണം പുറത്ത് മിനിമം കാലമെങ്കിലും താമസിക്കാതെ അക്കൗണ്ട്‌ എടുക്കാൻ പറ്റും എന്ന് തോന്നുന്നില്ല.

ഇവിടെ അമേരിക്കയിൽ ഉള്ളവരോട് ചോദിച്ചാൽ ഒരുമാതിരി പേരും അങ്ങനെ കാര്യമായി അയക്കുന്നവരല്ല. ഒക്കെ ഇവിടെ വന്നു കൂടി ഗ്രീൻ കാർഡ്‌ കാത്തിരിക്കുന്ന വേഴാമ്പലുകൾ ആണ്. പിന്നെ വല്ലപ്പോഴും അയക്കേണ്ടി വന്നാതന്നെ, ഓണ്‍ലൈൻ സൈറ്റുകൾ വഴി അയക്കുമത്രെ. 4 മണിക്കൂർ മാത്രമേ എടുക്കു. മെയിൻ സൈറ്റ് ഞാൻ കേട്ടത് Xoom.com ആണ്. പക്ഷെ ഡോളറിനു 1 രൂപ വച്ച് അവന്മാർ എക്സ്ചേഞ്ച് റേറ്റ് കുറയ്ക്കും. ഇവിടെ ഉള്ളവന്മാർക്ക് അതൊന്നും പ്രശ്നമല്ല പെട്ടെന്ന് കാശ് എത്തുമല്ലോ എന്നതാണ് ചിന്ത. എനിക്ക് അവിടേക്ക് കാശ് പെട്ടെന്ന് എത്തിയിട്ട് ഒന്നും ചെയ്യാനില്ല. മാസാമാസം വീട്ടിലേക്ക് അയക്കുന്ന പൈസയാണ് .നമുക്ക് കറക്റ്റ് ആയിട്ട് അറിയാം എന്ന് എത്തണമെന്ന്. അതുകൊണ്ട് കുറച്ചു മുൻപേ വേണമെങ്കിൽ അയക്കാനും കുഴപ്പമില്ല. ഒരു തവണ മാത്രം ഞാൻ Xoom വഴി അയച്ചു. പിന്നെ ആ ഭാഗത്തേക്ക് പോകാൻ തോന്നിയില്ല.

പിന്നെ ആരോടും ചോദിക്കാതെ ഓണ്‍ലൈൻ തപ്പി.അങ്ങനെയാണ് താഴെ കൊടുത്തിരിക്കുന്ന രണ്ടു കൊളുത്തുകൾ കിട്ടിയത്

http://www.compareremit.com/compare-money-transfer-services-to-india/
http://www.entryindia.com/exchange_rates

ഈ രണ്ടു സൈറ്റുകളും വിവിധ സൈറ്റുകൾ അപ്പപ്പോൾ കൊടുക്കുന്ന ട്രാൻസ്ഫർ റേറ്റ് കാണിച്ചു തരും. അവിടെ നിന്നാണ് ആ പഴയ WesternUnion വീണ്ടും കിട്ടുന്നത്. അവിടം തൊട്ട് ഇന്നുവരെ അതാണ് ഉപയോഗിക്കുന്നത്. ഞാൻ നോക്കുമ്പോൾ എനിക്കുവേണ്ട താഴെക്കാണുന്ന ഗുണങ്ങൾ ഒക്കെ  അതിനുണ്ട്.
  • ഏറ്റവും കൂടുതൽ എക്സ്ചേഞ്ച് റേറ്റ് ഇല്ലെങ്കിലും അത്യാവശ്യം കുഴപ്പമില്ലാത്ത റേറ്റ് ഉണ്ട്.
  • അമേരിക്കൻ ബാങ്ക് to ഇന്ത്യൻ ബാങ്ക് ആണെങ്കിൽ വേറെ ഫീസ്‌ ഒന്നും ഇല്ല.
  • SBI യുടെ NRI അക്കൗണ്ട്‌ ആണ് ഞാൻ ഉപയോഗിക്കുന്നത്. അതിൽ നേരെ ചെന്ന് വീഴുന്നുണ്ട്. 
  • ഓണ്‍ലൈൻ വഴി കാര്യങ്ങൾ സിമ്പിൾ ആയി ചെയ്യാം.
സംഗതി ഇവിടെ നിന്നും നാട്ടിൽ എത്താൻ 3-4 ദിവസങ്ങൾ പിടിക്കും എന്നൊരു പ്രശ്നം മാത്രമേ ഉള്ളൂ. ആർക്കെങ്കിലും വേറെ വഴികൾ അറിയുമെങ്കിൽ കമന്റ്‌ ഇടാൻ മറക്കരുത്. 

2015, ഒക്‌ടോബർ 10, ശനിയാഴ്‌ച

ഓണ്‍ലൈൻ പ്രാർത്ഥന പുസ്തകം - ഫേസ് ബുക്ക് കമന്റ്‌

കുറച്ചു കാലം മുന്പ് ഒരു ഓണ്‍ലൈൻ പ്രാർത്ഥന പുസ്തക അപ്ലിക്കേഷൻ ഉണ്ടാക്കി എന്ന് പറഞ്ഞു പോസ്റ്റ്‌ ഇട്ടിരുന്നു. അത് അങ്ങനെ തന്നെ പിന്നെ ഉപേക്ഷിച്ചു എന്ന് ആരും കരുതരുത്. സമയം ഇല്ലാത്തതുകൊണ്ടാണ്. ഇപ്പോൾ കുറച്ചു സമയം കിട്ടി. അപ്പോൾ തന്നെ കുറച്ചു ഫീച്ചറുകൾ കയറ്റി  

ഒന്നാമത്തേത് ഇപ്പോൾ ഫേസ് ബുക്ക് വഴി കമന്റ്‌ ഇടാൻ പറ്റും എന്നതാണ്. പ്രാർത്ഥന പുസ്തകം താഴെ കൊടുത്തിരിക്കുന്ന കൊളുത്തിൽ ക്ലിക്കി തുറന്നാൽ കമന്റ്‌ ഇടാം.
http://joymononline.in/apps/prayerbook/index.html

രണ്ടാമത്തെ ഫീച്ചർ അതിൽ വന്നുപോയവരുടെ എണ്ണം കാണിക്കുന്നതാണ്. എണ്ണംപിടിക്കുന്നത് ഗൂഗിൾ ആണ്. പുസ്തകം അവരോടു എല്ലാ ദിവസവും ഒരു പ്രാവശ്യം എണ്ണം ചോദിച്ചു അതിന്റെ കൈയ്യിൽ വയ്ക്കും എന്നിട്ട് ആ എണ്ണം കാണിക്കും. വെറുതെ എന്തിനാ എപ്പോഴും ചോദിച്ച്‌ ഗൂഗിളിന്റെ എണ്ണം തെറ്റിക്കുന്നത്? പറഞ്ഞു വന്നത് എന്താണെന്നു വച്ചാൽ, ഇപ്പോൾ നിങ്ങൾ വന്നു നോക്കുമ്പോൾ തന്നെ ആ എണ്ണം കൂടില്ല. പിറ്റേ ദിവസം മാത്രമേ കൂടൂ.

അപ്പോൾ മറക്കേണ്ട മൊബൈൽ നോക്കി പ്രാർത്ഥന ചൊല്ലാൻ താൽപര്യം ഉള്ളവർക്ക് സൈറ്റിൽ നോക്കാം. അല്ലാത്തവർക്കും പോകാം കുഴപ്പമൊന്നുമില്ല.

അടുത്ത പ്ലാൻ പാട്ടുകൾ ആണ്. എല്ലാ പാട്ടുകളും ഇല്ല. പറ്റാവുന്ന അത്രയും. അതുകഴിഞ്ഞ് വണക്കമാസം ഒരു പിടിയുണ്ട്. അത് എപ്പോൾ തീരുമോ എന്തോ?


2015, സെപ്റ്റംബർ 16, ബുധനാഴ്‌ച

മൂന്നാം വിവാഹവാർഷികം

അങ്ങനെ വിജയകരമായി 3 കൊല്ലങ്ങൾ കഴിഞ്ഞു. ആദ്യത്തെ നന്ദി ധന്യക്ക് തന്നെ. പിന്നെ എന്നോടും. ചുമ്മാതിനല്ല  2 കൊല്ലം കൊണ്ട് തീർക്കേണ്ട MBA ഞാൻ 5 കൊല്ലം കൊണ്ട് പഠിച്ചത്.

ഈ കൊല്ലം കുറച്ചു കാലം അക്കരെ ഇക്കരെ ആയിരുന്നെങ്കിലും പിന്നത്തെ പകുതി അമേരിക്കയിൽ ഒരുമിച്ച് ആയിരുന്നു. അമേരിക്ക മുഴുവൻ കാണിക്കാൻ പറ്റിയില്ലെങ്കിലും ന്യൂ യോർക്കും, ന്യൂ ജേഴ്സിയിലും ഉള്ള കുറച്ചു സ്ഥലങ്ങൾ കാണിച്ചു.

തണുപ്പിനു മുന്പ് ധന്യക്കും,ജോഹനും വീണ്ടും നാട്ടിൽ പോകാനുള്ള ഒരു പ്ലാൻ ഉണ്ട്.സെപ്റ്റംബർ അവസാനം പോയി ഏപ്രിൽ ആദ്യം തിരിച്ചു വരാവുന്ന പോലെ. അങ്ങനെ വന്നാൽ എനിക്ക് വീണ്ടും ഒരു വിവാഹിത ബാച്ചിലർ ലൈഫ് കിട്ടും. കഴിഞ്ഞ ബാച്ചിലർ ലൈഫ് കഴിഞ്ഞപ്പോഴാണ് കൊളസ്ട്രോൾ കിട്ടിയത്.

സാധാരണ പറയും, ഭാര്യയെ ഭർത്താവ ഡ്രൈവിംഗ് പഠിപ്പിച്ചാൽ ആകെ പ്രശ്നമാകും, കുടുമ്പവഴക്കാകും എന്ന്. ഞാൻ ധന്യയെ ഡ്രൈവിംഗ് പഠിപ്പിച്ചപ്പോൾ പ്രശ്നമൊന്നും കണ്ടില്ല. പാർക്കിംഗ് ഏരിയയിൽ നന്നായി കാർ ഓടിക്കുന്നുണ്ട്. പുറത്തേക്ക് ഇതുവരെ പോയിട്ടില്ല. ഇപ്പോൾ ധന്യ അമേരിക്കൻ ഡ്രൈവിംഗ് ലൈസെൻസ് എടുക്കാൻ ശ്രമിച്ചു കൊണ്ടിരിക്കുന്നു.

ഞങ്ങൾ ഒരുമിച്ച് ചെയ്ത ഒരു വെബ്‌ സൈറ്റും ഇക്കൊല്ലം പുറത്തിറക്കി. ചുമ്മാ ഒരു ഓണ്‍ലൈൻ പ്രാർത്ഥന പുസ്തകം. ജോഹൻ നാട്ടിൽ നിന്നും കൊണ്ട് വന്ന പ്രാർത്ഥന പുസ്തകം  കീറിയപ്പോൾ വേറെ വഴി ഇല്ലാതെ ചെയ്തു തീർത്തതാണ്. പിന്നെ കൊള്ളാം എന്ന് തോന്നി.

ജോഹൻ ആളു വലുതായിക്കൊണ്ടിരിക്കുന്നു. അത്യാവശ്യം കുറുമ്പ് കൈയ്യിൽ ഉണ്ട്. അമേരിക്കയിൽ വന്നിട്ട് കാർ സീറ്റിൽ ഇരിക്കാനാണ് വിഷമം. സാധാരണ കുട്ടികൾ മുട്ടിൽ ഇഴയുന്നത്‌ പോലെയല്ല ആശാന്റെ ഇഴച്ചിൽ. കൈ കൊണ്ട് കുത്തി കാൽ വലിച്ചു വെച്ചാണ്‌ നീങ്ങുന്നത്. ആദ്യം കണ്ടപ്പോൾ പേടിച്ചു പോയെങ്കിലും അമ്മ ചെറുപ്പത്തിൽ അങ്ങനെ ആയിരുന്നു എന്നറിഞ്ഞപ്പോൾ സമാധാനമായി. ഇപ്പോൾ ശരിക്കും നടക്കുന്നു. അത്യാവശ്യം വാക്കുകൾ അമ്മ, അപ്പൻ, റ്റാറ്റ, കാക്ക, മീമി എന്നൊക്കെ പറയുന്നുണ്ട്. വിശപ്പിന്റെ അസുഖം ഒഴിച്ചാൽ വേറെ ഇടയ്ക്കിടെ കാര്യമായി അസുഖങ്ങൾ  വരാറില്ല.

ഇതുവരെ വാർഷികം എങ്ങിനെ ആഘോഷിക്കണം എന്ന് തീരുമാനിച്ചിട്ടില്ല. ശരിക്കും പറഞ്ഞാൽ ഗ്രിഗോറിയൻ കലണ്ടർ വച്ച് നോക്കുമ്പോഴാണ് ഇന്ന് വാർഷികം അതും ഇന്ത്യയിൽ ആദ്യം ദിവസം ആകും അവർ വിഷ് ചെയ്യുമ്പോൾ ഇവിടെ അമേരിക്കയിൽ ആ ദിവസം ആയിട്ടുണ്ടാകില്ല. ഗ്രിഗോറിയൻ അല്ലാത്ത വേറെ കലണ്ടർ വച്ച് നോക്കിയാൽ വേറെ ദിവസമായിരിക്കാം. ഇനി വർഷം എന്നൊരു സംഗതി ഇല്ലാത്ത കലണ്ടർ ആയിരുന്നെങ്കിലോ? ആ...എന്തായാലും എന്തെങ്കിലും ചെയ്യണം.

എന്തായാലും ഞങ്ങളെ രണ്ട് പേരെയും ഒരുമിപ്പിച്ച എല്ലാവരോടും, ആലോചന കൊണ്ട് വന്ന  ബ്രോക്കർ ചേട്ടനോടും, രണ്ട് കൂട്ടരും അന്വേഷിച്ചപ്പോൾ നല്ലത് പറഞ്ഞ ബന്ധുക്കളോടും, സുഹൃത്തുക്കളോടും, അതുപോലെ ഇപ്പോഴും പിന്തുണയ്ക്കുന്ന വീട്ടുകാരോടും, എല്ലാവരോടും ഒരായിരം നന്ദി...

ഒളിച്ചോടി കല്യാണം കഴിക്കുന്ന ,പ്ലാനിടുന്ന ധൈര്യശാലികളോടു ഒരു വാക്ക്. ഒരു കൊച്ചുണ്ടായിക്കഴിഞ്ഞാൽ അപ്പാപ്പനും, അമ്മാമ്മയും ഒന്നും ഇല്ലാതെ ഒറ്റയ്ക്ക് നോക്കിവളർത്തുക എന്നത് എട്ടിന്റെ പണി തന്നെയാണ്.

അടുത്ത ടിപ്പ്, എങ്ങിനെ കല്യാണം കഴിക്കുന്നവർ ആണെങ്കിലും ആണുങ്ങൾ നമ്മൾ കുറച്ചു പാചകം അറിഞ്ഞിരിക്കുന്നത് നല്ലതാണ്.

2015, സെപ്റ്റംബർ 12, ശനിയാഴ്‌ച

ഓണ്‍ലൈൻ കുടുംബപ്രാർത്ഥന പുസ്തകം

"അന്നന്ന് വേണ്ട ആഹാരം ഇന്ന് ഞങ്ങൾക്ക്" ദൈവം ചുമ്മാ എന്തായാലും കൊണ്ടുതരില്ല എന്ന് എല്ലാ പ്രാർത്ഥിക്കുന്നവർക്കും അറിയാം. പണിയെടുത്താൽ തന്നെയേ ജീവിക്കാൻ പറ്റു. പക്ഷെ കുടുംബപ്രാർത്ഥനയുള്ള വീടുകളിൽ അത്രയും സമയം എങ്കിലും എല്ലാവരും ഒന്നിച്ചിരിക്കുകയും, TV ഓഫ്‌ ചെയ്യുകയും ചെയ്യും. ഇപ്പോഴുള്ള ജീവിതരീതിയിലെ ജോലിയിൽ ആയാലും പഠനത്തിൽ ആയാലും ഒഴിച്ചുകൂടാനാവാത്ത മത്സരഓട്ടത്തിനിടയിൽ,  സീരിയൽ ഉണ്ടാക്കുന്ന ടെൻഷനിടയിൽ ഒരു അരമണിക്കൂർ പ്രാര്ത്ഥന എന്ന പേരിലെങ്കിലും സമാധാനത്തോടെയിരിക്കുന്നത് എന്തുകൊണ്ടും നല്ലതാണ്.

ഞാൻ പ്രാർത്ഥന കണ്ടു വളർന്ന ഞങ്ങളുടെ വീട്ടിലും സ്ഥിതി വ്യത്യാസമില്ല. കൂട്ടാൻ (കറി) ഫ്രിഡ്ജിൽ വച്ചോ എന്നും, കോഴിക്കൂട് അടച്ചോ എന്നും , ഉണക്കാൻ ഇട്ട തുണി എടുത്തോ എന്നൊക്കെയുള്ള ദിനവും ചെയ്യേണ്ട എന്നാൽ മറന്നു പോകാൻ സാധ്യതയുള്ള കാര്യങ്ങൾ കറക്റ്റ് ആയി ചെയ്യുന്നതിൽ പ്രാർത്ഥനക്കുള്ള പങ്ക് മറക്കാൻ പറ്റില്ല.

അരമണിക്കൂർ പവർ കട്ട്‌ സമയം ക്രിസ്ത്യാനികൾക്ക് ഒരു ബുദ്ധിമുട്ടായി തോന്നാത്തത് അര മണിക്കൂർ സന്ധ്യാപ്രാർത്ഥന ഉള്ളതുകൊണ്ടാണ് എന്നാണ് തോന്നുന്നത്. പവർ കട്ട്‌ ഉണ്ടായിരുന്നപ്പോൾ പ്രാർത്ഥന എപ്പോൾ എത്തിക്കണം എന്നതിനെ ചൊല്ലി ഒരു അഭിപ്രായ വ്യത്യാസങ്ങളും ഉണ്ടാകാറില്ല. ചൊല്ലണം എന്ന് സാധാരണ നമ്മൾ പറയാറില്ല എങ്ങിനെയെങ്കിലും അത് അങ്ങൊട്ട് എത്തിക്കലാണ് പരിപാടി.പക്ഷെ പവർ കട്ട്‌ ഇല്ലെങ്കിൽ എപ്പോൾ എത്തിക്കണം എന്നത് ഒരു ഭയങ്കര മെനക്കെട് പിടിച്ച പണിയാണ്. ഒരാൾക്ക് സീരിയൽ ആണെങ്കിൽ അത് കഴിഞ്ഞ് ആയിരിക്കും മറ്റേ ആൾക്ക് കോമഡി പരിപാടി. ഇതെല്ലാം കഴിയണമെങ്കിൽ പത്ത് പത്തര ആകേണ്ടി വരും. പിന്നെ ദൈവം ഉറങ്ങാൻ പോകില്ല എന്നൊരു ധൈര്യം ഉള്ളതുകൊണ്ട് എപ്പോൾ വേണമെങ്കിലും എത്തിക്കാം.

എന്തൊക്കെ പറഞ്ഞാലും അര മണിക്കൂർ പ്രാർത്ഥന കൊള്ളാവുന്ന ഒരു പരിപാടിയാണ്. കല്യാണം കഴിഞ്ഞിട്ട് പറ്റാവുന്ന ദിവസങ്ങളിൽ ഒക്കെ ഞങ്ങൾ ചൊല്ലാറുണ്ട്. അമേരിക്കയിൽ വന്നിട്ടും പരമാവധി ശ്രമിക്കുന്നുണ്ട്.

സംഗതി ചെറുപ്പത്തിൽ തന്നെ ചെയ്യുന്ന പരിപാടി ആണെങ്കിലും, അതിലെ പ്രാർത്ഥനകൾ എല്ലാവർക്കും ഓർമ്മ നിൽക്കില്ല. എങ്ങിനെ പോയാലും രഹസ്യങ്ങൾ ചൊല്ലാൻ ബുക്ക്‌ വേണ്ടി വരും. പിന്നെ പ്രത്യേകിച്ച് , വണക്കമാസം പ്രാർത്ഥനകൾ കൂടി ഉള്ളപ്പോൾ എന്തായാലും ബുക്ക് വേണ്ടി വരും . വണക്കമാസം സീസണ്‍ ആയിട്ടാണ് വരുക. ഒരു മാസം യൌസേപ്പിതാവിന്റെ, വേറെ മാസം  മാതാവിന്റെ, പിന്നെ ഒരു മാസം തിരുഹൃദയത്തിന്റെ  അങ്ങനെ. ഒരു പടി കൂടി കടന്നു ചെയ്യുന്നവർക്ക് പരിശുദ്ധ ആത്മാവിന്റെ കൂടി ചെല്ലാം. എന്റെ അറിവിൽ ന്യൂ ജെനേറെഷൻ (2000 -നു ശേഷം ഉണ്ടായ അണുകുടുംബങ്ങൾ ) ആരും വണക്കമാസം വായിക്കാറില്ല.

ബുക്ക്‌ രസമുള്ള പരിപാടിയാണ്. ഒരു ബുക്കിൽ രഹസ്യങ്ങൾ ചൊല്ലുമ്പോൾ "ധ്യാനിക്കാം" എന്ന് വരെയേ ഉണ്ടാകു പിന്നെ "സ്വർഗ്ഗസ്ഥനായ" എന്ന പ്രാർത്ഥന ചൊല്ലുകയാണ്. മറ്റു ചില പ്രസ്സുകാർ ഇറക്കുന്ന ബുക്കുകളിൽ ധ്യാനിക്കാം എന്ന് പറഞ്ഞിട്ട് പിന്നെ ഒരു പരഗ്രഫ് കൂടെയുണ്ട് "സ്വർഗ്ഗസ്ഥനായ" പ്രാർത്ഥന ചൊല്ലുവാൻ. പണ്ടൊക്കെ എന്റെ ചെറുപ്പത്തിൽ ഞാനൊക്കെ ഒരു പുസ്തകം കീറിക്കളഞ്ഞാൽ അടുത്ത പെരുന്നാൾ വരെ കാത്തിരിക്കണം വേറെ ഒരു പുസ്തകം വാങ്ങിക്കണമെങ്കിൽ. അതുവരെ വീട്ടുകാർക്ക് കീറിയ പുസ്തകം ഒട്ടിച്ചു അഡ്ജസ്റ്റ് ചെയ്യണം. അപ്പോൾ ചില പ്രാർത്ഥനകൾ ഇല്ലാതെ എത്തിക്കേണ്ടി വരും.

മത്തൻ കുത്തിയാൽ കുമ്പളം മുളക്കില്ല എന്ന് പറയുന്നതുപോലെ ജൂനിയർ ജോയ്മോൻ പ്രാർത്ഥന ബുക്ക്‌ കീറില്ല എന്ന് വിചാരിക്കുന്നത് ശുദ്ധ മണ്ടത്തരമാണ്. ഞാൻ ബൈബിൾ കീറിയിട്ടുള്ള നിലക്ക് അവൻ കുടുംബ പ്രാര്ത്ഥന ബുക്ക്‌ കീറിയില്ലെങ്കിൽ മോശമല്ലേ. ഞങ്ങളുടെ പ്രതീക്ഷകൾ അവൻ ഒട്ടും തെറ്റിച്ചില്ല. അമേരിക്കയിൽ വന്ന പാടെ ആശാൻ ബുക്ക്‌ നോട്ടമിട്ടിരുന്നു.രണ്ട് ആഴ്ച വേറെ നല്ല പടങ്ങൾ ഉള്ള മാസികകൾ കൊടുത്തു ശ്രദ്ധ തിരിക്കാൻ ശ്രമിച്ചെങ്കിലും അവൻ പ്രാർത്ഥന ബുക്ക്‌ വിദഗ്ദ്ധമായി കീറി.

നാട്ടിൽ ഇപ്പോൾ ഭക്തി കൂടിയതുകൊണ്ടോ എന്തോ കുറെ കടകളിൽ പ്രാർത്ഥന ബുക്ക്‌ കിട്ടും. ഒന്നും പറ്റിയില്ലെങ്കിൽ ബിഷപ്പ് ഹൗസിന്റെ അടുത്ത് ഇരിങ്ങാലക്കുടയിൽ  വിദ്യജ്യോതി ബുക്ക്‌ കിട്ടും. അമേരിക്കയിൽ എവിടെ കിട്ടാൻ? ഇംഗ്ലീഷ് പ്രാർത്ഥന ചൊല്ലിയാൽ ഇനി ദൈവത്തിനു മനസിലാകുമോ എന്നൊരു സംശയം ഉള്ളതുകൊണ്ട് ആ പണിക്കു പോയില്ല.

ആകെയുള്ള ഒരു വഴി ആരെങ്കിലും നാട്ടിൽ നിന്നും വരുമ്പോൾ കൊടുത്തയക്കുക എന്നതാണ്. പക്ഷെ എത്ര ബുക്കുകൾ എന്നത് ഒരു ചോദ്യമായി?

പുട്ടിനു പീര പോലെ ചറ പറ, 2 വീതം മൂന്നു നേരം സൊലൂഷൻസ് കൊടുത്ത് നാട്ടുകാരുടെ പ്രശ്നങ്ങൾ തീർക്കുന്ന എന്നെപോലെയുള്ള ഒരു സോഫ്റ്റ്‌വെയർ ആർക്കിട്ടെക്റ്റ് സ്വന്തം മോനുണ്ടാക്കുന്ന പ്രശ്നം തീർക്കാൻ പഴഞ്ചൻ വഴിതേടുന്നത് മോശമല്ലേ? സ്വന്തം പ്രശ്നം, മോഡേണ്‍ സോഫ്റ്റ്‌വെയർ ടെക്നോളജി ഉപയോഗിച്ച് പരിഹരിക്കാതെ നാട്ടുകാർക്ക്‌ ഇനി സൊലൂഷൻസ് കൊടുക്കില്ല എന്നാ ദൃഡനിശ്ചയമാണ് എന്നെക്കൊണ്ട് അല്ല ഞങ്ങളെക്കൊണ്ട് ആ കടുംകൈ ചെയ്യിച്ചത്. ഞങ്ങൾ എന്ന് പറഞ്ഞാൽ ഞാനും എന്റെ നല്ല പാതിയും.

ഒന്നുമില്ല ഒരു ചെറിയ

"ഓണ്‍ലൈൻ കുടുംബപ്രാർത്ഥന പുസ്തകം"

തൃശൂർ ഭാഗത്ത്‌ സാധാരണ റോമൻ കാത്തോലിക് വിശ്വാസികൾ ചൊല്ലുന്ന സന്ധ്യാപ്രാർത്ഥനകൾ ഒരു വെബ്‌ സൈറ്റ് ആയി ഹോസ്റ്റ് ചെയ്തു. താഴെ കൊടുത്തിരിക്കുന്ന കൊളുത്തിൽ ഞെക്കിയാൽ പ്രാർത്ഥന പുസ്തകം കാണാം.

http://joymononline.in/apps/prayerbook/index.html

ട്വിറ്റെർ ഇറക്കിയ Bootstrap എന്ന ടെക്നോളജി(Framework) ഉപയോഗിച്ചതുകൊണ്ട് സൈറ്റ് മൊബൈലിൽ ഓപ്പണ്‍ ചെയ്താലും, ടാബ്ലെറ്റിൽ തുറന്നാലും വലിയ കുഴപ്പം ഇല്ലാതെ ഇരിക്കും. ഞാനാരാ മോൻ എനിക്കറിഞ്ഞുകൂടെ പ്രാർത്ഥന എത്തിക്കുമ്പോൾ ആരും ലാപ്ടോപ് തുറന്നു വയ്ക്കില്ല എന്ന്. പിന്നെ ആളൊന്നുക്ക് ഇപ്പോൾ 2 മൊബൈലും 1 ടാബും ആണല്ലോ.

ഇനി പ്രാർത്ഥന എത്തിക്കുമ്പോൾ മൊബൈൽ ഉപയോഗിച്ചാൽ ദൈവത്തിനു അത് ഇഷ്ടമാകുമോ എന്ന് ഒരു ചോദ്യം ഉയർന്നു വരാം.

എന്റെ ഒരു ഊഹം ശരിയാണെങ്കിൽ ഇതേ ചോദ്യം പണ്ട് കടലാസ് ആദ്യമായി പ്രചാരത്തിൽ വന്നപ്പോഴും ഉയർന്നു വന്നിരിക്കണം. മനപ്പാഠം പഠിച്ചു ചൊല്ലിയിരുന്ന പ്രാർത്ഥനകൾ പേപ്പറിൽ നോക്കി ചൊല്ലിയപ്പോൾ അന്നത്തെ മുതിർന്ന തലമുറക്ക് അത് അത്രയ്ക്ക് ഇഷ്ടപ്പെട്ടു കാണില്ല. അവർ കടലാസ്സിൽ നോക്കി പ്രാർത്ഥന  ചൊല്ലുന്നത് ദൈവത്തിനു ഇഷ്ടമാകില്ല എന്ന് പറഞ്ഞിരിക്കാം. അത് വിചാരിച്ചു ഇപ്പോൾ (മുതിർന്നവർ ഉൾപ്പെടെ) ആരെങ്കിലും അങ്ങനെ പറയുമോ? തലക്കകത്ത് ആൾ താമസം ഉള്ളവർ ആരും അങ്ങനെ പറയില്ല എന്ന് കരുതുന്നു.

പിന്നെ ഉയരാവുന്ന ഒരു ചോദ്യം കുട്ടികൾ മൊബൈൽ പ്രാർത്ഥന ചൊല്ലുമ്പോൾ അവർ അതിൽ പ്രോഗ്രാം സ്വിച്ച് ചെയ്തു വല്ല ഗെയിംസ് എടുക്കുമോ എന്നതാണ് അതുപോലെ അവർ മെസ്സേജ് അയച്ചു കളിക്കുമോ എന്നും ഒരു സംശയം വരാം. ഇപ്പോഴുള്ള പ്രാർത്ഥന ബുക്കിനിടയിൽ വേറെ ഒരു ബുക്ക്‌ ഉദാഹരണമായി ബാലരമ വച്ച് വായിക്കാം എന്നുള്ളത് കൊണ്ട് ബുക്ക്‌ വേണ്ട എന്ന് പറയുന്ന പോലെയാകും അത്. വീഡിയോ ചാറ്റ് വഴി ഒന്നും അല്ലല്ലോ പ്രാർത്ഥന ചൊല്ലുന്നത്. ഒരേ മുറിയിലല്ലേ? മുതിർന്നവർ അവിടെ ഇരിക്കുന്നത് പിന്നെ എന്തിനാണ്?

ഞങ്ങൾ കഴിഞ്ഞ 4 മാസമായി ഈ സൈറ്റ് വഴിയാണ് പ്രാർത്ഥന എത്തിക്കുന്നത്. വലിയ കുഴപ്പങ്ങൾ ഒന്നും കണ്ടില്ല.


ഈ പ്രാർത്ഥന പുസ്തകത്തിന്റെ ലിങ്ക്,അല്ലെങ്കിൽ ഈ ബ്ലോഗ്‌ പോസ്റ്റ്‌ ലിങ്ക് , ഫേസ്ബുക്ക് വഴിയോ വാട്ട്‌സാപ്പ് വഴിയോ 500 പേർക്ക് അയക്കുന്നവർക്ക് ദൈവത്തിന്റെ അനുഗ്രഹം ഉണ്ടായിരിക്കുന്നതാണ്. എന്താണ് അനുഗ്രഹം എന്ന് ചോദിക്കരുത് അത് സർപ്രൈസ്.

ഈ പ്രാർത്ഥന ബുക്കിന്റെ തുടർ പണികൾ ചെയ്യാൻ ഞങ്ങളുടെ കൂടെ കൂടുന്നവർക്ക് ദൈവത്തിന്റെ പ്രത്യേകമായ അനുഗ്രഹവും, ബയോടാറ്റയിൽ HTML5, AngularJS, Bootstrap തുടങ്ങിയ ടെക്നോളജികൾ വയ്ക്കാൻ പറ്റുന്നതുകൊണ്ട്  ഉദ്യോഗക്കയറ്റം കിട്ടുന്നതുമാണ്.

അപ്പോൾ പ്രാർത്ഥന പുസ്തകത്തിന്റെ ലിങ്ക് മറക്കണ്ട.

http://joymononline.in/apps/prayerbook/index.html

ബ്ലോഗ്‌ പോസ്റ്റിന്റെ ലിങ്ക്

http://joy-mon.blogspot.com/2015/09/blog-post.html

2015, ജൂൺ 20, ശനിയാഴ്‌ച

സ്വസ്തി നന്മ പൂരിതേ നിന്നോടുകൂടെ നാഥനും...

സ്വസ്തി നന്മ പൂരിതേ നിന്നോടുകൂടെ നാഥനും
സ്ത്രീകളിൽ അനുഗ്രഹീത നിൻകുമാരനേശുവും
പാപരഹിതയയ  മേരി തമ്പുരാൻറെ അമ്മ നീ
പാപികൾ ഞങ്ങൾക്കുവേണ്ടി പ്രാർത്ഥിക്കേണമെപ്പൊഴും

ഇത് ഇപ്പോൾ ആറേഴു കൊല്ലമായി തൃശൂർ ജില്ലയിൽ ഓരു മാതിരിപെട്ട പള്ളികളിൽ ഒക്കെ പാടുന്ന പാട്ടാണ്. നന്മ നിറഞ്ഞ മറിയമേ എന്നാ പ്രാർത്ഥനയുടെ ഗാനരൂപം. എന്റെ ആന്റിയുടെ (അപ്പന്റെ ചേച്ചി)ഓർമ്മ ശരിയാണെങ്കിൽ പുള്ളിക്കാരി പണ്ട് ലീജിയൻ ഓഫ്  മേരി സംഘടനയിൽ പ്രവർത്തിച്ചപ്പോൾ ഉണ്ടാക്കിയ പാട്ടാണ്. പിന്നെ അത് ഹോളി ഫാമിലി സിസ്റ്റെർസ് വഴി പുറത്തു പോയതാവാമത്രേ. സിസ്റ്റർമാരും അപ്പോൾ ആ സംഘടനയിൽ ഉണ്ടായിരുന്നു. അവർ ഇടക്കിടെ മാറുകയും ചെയ്യും. അന്ന് അവിടെയുണ്ടായിരുന്ന മിക്കവാറും സിസ്റ്റർമാരും ഇന്ന് ജീവിച്ചിരിപ്പില്ല. 

പുള്ളിക്കാരിക്ക് ഇപ്പോൾ പത്തെണ്‍പതു വയസ്സായി. ഇരുപത് ഇരുപത്തഞ്ചു കൊല്ലങ്ങൾ മുന്പായിരിക്കാം പാട്ട് ഉണ്ടാക്കിയത്. അന്ന് പള്ളികളിൽ പരിപാടികൾ വരുമ്പോൾ സംഘടന വഴി നാടകങ്ങളും ഡാൻസും ഒക്കെ ഉണ്ടാക്കുന്ന കൂട്ടത്തിൽ ഇതും ചെയ്തിരിക്കാം. വലിയ കാര്യമായി എടുത്തിട്ടുണ്ടാകില്ല. "സ്വർഗ്ഗസ്ഥനായ ഞങ്ങളുടെ  പിതാവേ.." എന്നാ പ്രാർത്ഥനയുടെ പാട്ട് അന്ന് ഉണ്ടായിരുന്നത്രേ അതുകൊണ്ട് അത് ഉണ്ടാക്കിയില്ല.

ഞാൻ പാട്ട് പുസ്തകങ്ങളിൽ ഒന്നും ഈ പാട്ട് കണ്ടിട്ടില്ല. ചിലപ്പോൾ പുള്ളിക്കാരിയുടെ ഓർമ്മ ശരിയായിരിക്കാം. എന്തായാലും പാട്ട് കൊള്ളാം.