അങ്ങനെ വിവാഹശേഷമുള്ള ഒരു വര്‍ഷം വളരെ വിജയകരമായി മാതൃകാപരമായി പൂര്‍ത്തിയാക്കി എന്നൊന്നും ഞാന്‍ പറയുന്നില്ല. എന്നാലും സാധാരണപോലെ നന്നായി നടന്നു. അല്ലെങ്കില്‍ അഹങ്കാരമാകും. താന്‍പാതി ദൈവം പാതി എന്നാണല്ലോ. നമ്മള്‍ നമ്മുടെ പാതി ചെയ്തപ്പോള്‍ പുള്ളിക്കാരനും അങ്ങേരുടെ പാതി ചെയ്തുകാണും. അങ്ങനെ നോക്കുമ്പോള്‍ പുള്ളിക്കാരനോടാണ് ആദ്യമായി നന്ദി പറയേണ്ടത്. പിന്നെ നമ്മള്‍ നമ്മുടെ പാതി ചെയ്തു എന്നു പറയുമ്പോള്‍ ഞാന്‍ ഒറ്റക്കല്ലല്ലോ ആ പാതി ചെയ്യുന്നത് ധന്യയും കൂടിയാണ്. അങ്ങനെ അവള്‍ക്കും നന്ദി. എന്നാലും പോരാ ഇനിയും നന്ദി പറയേണ്ട കുറെ ആളുകളുണ്ട്. എന്‍റെയും അവളുടെയും വീട്ടുകാര്‍, ബന്ധുക്കള്‍ , കൂട്ടുകാര്‍, നാട്ടുകാര്‍ അങ്ങനെ എല്ലാവര്‍ക്കും നന്ദി.
സാധാരണ ഞാന്‍ കണ്ടിട്ടുള്ളതു, കല്യാണത്തിന് ശേഷം ആദ്യത്തെ ഒരു ചേഞ്ച് വരുന്നത് ഹണിമൂണ്‍ കഴിയുന്നതോടെയാണ്. ഹണിമൂണ്‍ കാലത്ത് മുത്തേ,ചക്കരേ എന്നു വിളിച്ചുനടന്ന ,ആകാശത്തിലെ നക്ഷത്രങ്ങളെ വാങ്ങിതന്നിരുന്ന ,എപ്പോഴും കൂടെയുള്ള തമാശ പറയുന്ന ചേട്ടന്‍, ജോലിക്കു പോയിതുടങ്ങിയത്തോടുകൂടി സ്വഭാവം മാറുന്നു. ഭര്‍ത്താവിനെ പറഞ്ഞിട്ടു കാര്യമില്ല. ഹണിമൂണ്‍ കാലം പോലെ എല്ലാക്കാലത്തും പറ്റുമോ? വീട്ടില്‍ അരി വാങ്ങേണ്ടേ? ഞങ്ങള്‍ പക്ഷേ ഹണിമൂണ്‍ പോകാത്തതുകൊണ്ട് ഇങ്ങനെ ഒരു പ്രശ്നമേ ഉണ്ടായില്ല. അല്ലെങ്കിലും എന്തിനാ ഒരു ട്രിപ്പ് പോകുന്നതിനു ഒരു ലേബല്‍? സാധാരണപോലെ ഒരു ടൂര്‍ അങ്ങ് പോയാപ്പോരേ? ഓഹോ അങ്ങനെയാണോ എന്നാല്‍ നിങ്ങള്‍ എത്ര ടൂര്‍ പോയി എന്നൊന്നും ആരും ചോദിക്കരുത്. അതെല്ലാം ഞങ്ങളുടെ സ്വകാര്യങ്ങളാണ്.
അടുത്തെ ഒരു ചേഞ്ച് അല്ലെങ്കില്‍ ഒരു ക്ലാഷ് വരുന്ന കാര്യമാണ് കല്യാണത്തിന് ശേഷം കുറച്ചു ദിവസം ഓഫീസില്‍ നിന്നും നേരത്തെ വരുക .സെക്കന്‍ഡ് ഷോയ്ക്ക് കൊണ്ടുപോകുക. പിന്നെ പതുക്കെ പതുക്കെ പഴയപ്പോലെ നേരം വൈകുക എന്നത്. എന്‍റെ കമ്പനി ഇങ്ങനെയുള്ള പ്രശ്നങ്ങള്‍ ജോലിക്കാര്‍ക്ക് ഉണ്ടാകരുത് എന്ന്‍ ആത്മാര്‍ഥമായിട്ട് ആഗ്രഹിക്കുന്നതുകൊണ്ട് ഒരിക്കല്‍ പോലും എനിക്കു രാത്രി 9 മണിക്ക് മുന്പ് വരാന്‍ കഴിഞ്ഞിട്ടില്ല.
പിന്നെയുള്ള ഒരു കാര്യമാണ് സാമ്പത്തികം. അതിന് ധന്യയോട് എനിക്കു വളരെയധികം നന്ദിയുണ്ട്. കാരണം അതുവാങ്ങണം, ഇത് വാങ്ങണം എന്നൊന്നും കാര്യമായിട്ട് എന്നോടോന്നും പറഞ്ഞിട്ടില്ല. പിന്നെ നമ്മള്‍ എല്ലാം കണ്ടറിഞ്ഞു വാങ്ങിക്കുന്നതുകൊണ്ട് അങ്ങനെ ഒരാവശ്യമില്ല. ഇത്രയെങ്കിലും ഫൈനാന്‍സ് മാനേജ്മെന്‍റ് അറിയില്ലെങ്കില്‍ പിന്നെ, 2 കൊല്ലം കൊണ്ട് തീരേണ്ട MBA, ഓരോ പാഠവും വളരെ വിശദമായി പഠിച്ചു 5 കൊല്ലം കൊണ്ട് ഞാന്‍ പാസായത് വെറുതെയാവില്ലേ?
ഈയൊരു ഡയലോഗ് കാണുമ്പോള്‍ എല്ലാവരും പിശുക്ക് എന്നു വിളിക്കുമെങ്കിലും ,എല്ലാ അവന്മാരുടെയും പ്രത്യേകിച്ചു കെട്ടിയവന്‍മാരുടെ മനസില്‍ ഒരു ചോദ്യമുണ്ടാകും .ഇതെങ്ങിനെ സാധിക്കുന്നളിയാ? ഒരു 10 കൊല്ലം, ഈ ബഡ്ജെറ്റിങ് കുഴപ്പമില്ലാതെ പോകുകയാണെങ്കില്‍ ബഡ്ജെറ്റിങ് രഹസ്യങ്ങള്‍ ഇതേ ബ്ലോഗില്‍ പോസ്റ്റ് ചെയ്യുന്നതായിരിക്കും.
പിന്നെ അമ്മായിയമ്മപ്പോര് / മരുമോള്‍ പോര്. അമ്മ ഇതുവരെ പെന്‍ഷന്‍ ആകാത്തതുകൊണ്ടും, അമ്മക്ക് ടിവിയില്‍ ഉള്ള പോരെടുക്കല്‍ എഡ്യുകേഷന്‍ പ്രോഗ്രാംസ് ആയ സീരിയല്‍സുകള്‍ കാണാന്‍ കാര്യമായ സമയം കിട്ടാത്തതുകൊണ്ടും, ധന്യക്ക് മലയാളം സീരിയല്‍ കാണാന്‍ താല്‍പര്യം ഇല്ലാത്തതുകൊണ്ടും, ബുദ്ധിപരമായി ഞങ്ങള്‍ ആഴ്ചയില്‍ ഒരു പ്രാവശ്യം മാത്രം ജോലിസ്ഥലത്തുനിന്നും വീട്ടില്‍ വന്നു പോകുന്നതുകൊണ്ടും അങ്ങനെ ഒരു ചാന്‍സ് രണ്ടുപേര്‍ക്കും കിട്ടിയിട്ടില്ല.
ഇനിയും കാര്യങ്ങള്‍ പറഞ്ഞാല്‍ ആളുകള്‍ മനസില്‍ വിചാരിക്കാന്‍ തുടങ്ങും. "മോനേ ഒരു കൊല്ലമല്ലേ ആയിട്ടുള്ളൂ. ഇനിയെന്തൊക്കെ കാണാന്‍ കിടക്കുന്നു. അപ്പോഴും ബ്ലോഗ്ഗില്‍ എഴുതുമ്പോള്‍ ഇതേ സ്പിരിറ്റ് കാണണം" എന്നു. അതുകൊണ്ട് ഇനിയും കുറെ പ്രാവശ്യം ഇതുപോലത്തെ വിവാഹ വാര്‍ഷിക പോസ്റ്റുകള്‍ ഇടാന്‍ സര്‍വേശ്വരന്‍ അനുഗ്രഹിക്കട്ടെ എന്നു പ്രാര്‍ഥിച്ചുകൊണ്ട്...
