വീണ്ടും ഒരു കുടുംബസംഗമം. ഞാൻ ഫെബ്രുവരി മാസത്തിൽ നാട്ടിൽപോയി മാർച്ചിൽ ധന്യയേയും പിള്ളേരെയും തിരിച്ചു കൂട്ടികൊണ്ടു വന്നു. ഈ കാലഘട്ടത്തിലെ നഷ്ടം അമ്മായിയുടെ വിയോഗം ആയിരുന്നു. സംഗതി ആൾക്ക് വയസായി, അതിന്റെതായ രോഗങ്ങളും ഉണ്ടായിരുന്നു. ഇടയ്ക്കിടെ തല്ലു കൂടുമെങ്കിലും ആള് ഇല്ലാതെ ആയപ്പോൾ ഒരു വിടവ്.
ലൈനടിച്ചു കല്യാണം കഴിക്കാതെ ഇന്റർവ്യൂ ചെയ്തു കഴിച്ചത് വെറുതെ ആയില്ല എന്ന് തോന്നിയത് ഇക്കൊല്ലം ആണ്. നമുക്ക് പ്രശ്നം വന്നാൽ ആരെങ്കിലും ഒക്കെ ഉണ്ടാകും എന്ന് തോന്നുന്നു. നീയായി നിന്റെ പാടായി എന്ന് അവർക്ക് തിരിച്ചു പറയാൻ പറ്റില്ലല്ലോ. ഇത് കേട്ടാൽ തോന്നും, ഞാൻ എന്തോ പഠിക്കുന്ന കാലത്തു ലൈനടിച്ചു പെങ്കുട്ട്യോളെ വീഴ്ത്തിയിരുന്ന ആളായിരുന്നു എന്ന്. വർത്താനം പറയുന്നത് പോട്ട്, ഇടങ്കാല് വെച്ച് വീഴ്ത്താനുള്ള ധൈര്യം ഉണ്ടായിരുന്നേൽ മതിയായിരുന്നു.
നാട്ടിൽ നിൽക്കേണ്ട അമേരിക്ക തന്നെയാണ് പിള്ളേർക്ക് നല്ലത് എന്ന് ഒരിക്കൽ കൂടി തോന്നിയ വര്ഷം ആയിരുന്നു ഇത്. ജോഹനെ നാട്ടിലെ പേര് കേട്ട സ്കൂളിൽ ചേർത്തിയിരുന്നു എന്ന് കഴിഞ്ഞ വാർഷിക പോസ്റ്റിൽ പറഞ്ഞിരുന്നല്ലോ. ഞാൻ ഇക്കൊല്ലം ഫെബ്രുവരിയിൽ നാട്ടിലെത്തുമ്പോൾ ഓൺലൈൻ ക്ലാസ് കേട്ടിരുന്നു. ടീച്ചർ ഇന്ത്യൻ നാണയ വ്യവസ്ഥയെപ്പറ്റി ക്ലാസ് എടുത്തു കത്തിക്കയറുകയാണ്. കുറച്ചു കഴിയുമ്പോൾ കേൾക്കുന്നു. ഇത് നിരോധിച്ച നോട്ട് ആണ്, സിലബസിൽ ഈ നോട്ടുകൾ ആയതുകൊണ്ട് ആണ് ഇത് പഠിപ്പിക്കുന്നത്. സത്യത്തിൽ ഈ നോട്ടു ഇപ്പോൾ എടുക്കില്ല. അപ്പോൾ ഞാൻ വിചാരിച്ചു, പുതിയ നോട്ടുകൾ പിള്ളേരെ കാണിക്കുമായിരിക്കും. അതില്ല, പഴയ നോട്ടുകൾ പരീക്ഷക്ക് ചോദിക്കും അത് കൊണ്ട് അത് മാത്രം പഠിപ്പിക്കുക. അടിപൊളി. വെറുതെ അല്ല ഗ്രൗണ്ടിൽ പശുവിനെ മേക്കാൻ പോയ ആള് വരെ SSLC പാസാകുന്നത്.
ജെറിനു കുറച്ചു ആഴ്ചകൾ എങ്കിൽ അത്ര അങ്കണവാടിയിൽ പോകാൻ പറ്റി. വേണേൽ അവനു വലുതാകുമ്പോൾ അവൻ്റെ പിള്ളേരോട് പറയാം, ഞാൻ ഇന്ത്യയിലെ അങ്കണവാടിയിൽ പഠിച്ചിട്ടുണ്ട് എന്നൊക്കെ. നാട്ടിലെ വാട്ട്സാപ്പ് കേശവൻമാമന്മാരുടെ ഒരു ട്രെൻഡ് ആണല്ലോ പഴയ ദാരിദ്രം പറഞ്ഞു എന്തോ കേമൻ എന്ന് കാണിക്കൽ. സംഗതി തുറന്നു പറയണമല്ലോ, എൻ്റെ കാലത്തു ഉണ്ടായിരുന്ന അങ്കണവാടി അല്ലാട്ടോ, സംഗതി കളറാണ്. പിള്ളേർക്ക് അവിടേക്ക് പോകാൻ തോന്നും.
ഇക്കൊല്ലം വീണ്ടും ഞാൻ ധന്യയെ ജോലിക്ക് വേണ്ടി പ്രോഗ്രാമിങ് പഠിപ്പിക്കുന്ന പണി ഏറ്റെടുത്തിരുന്നു. ഞങ്ങൾ പ്രോഗ്രാമ്മർമാർ ചെയ്യുന്ന ഏറ്റവും റിസ്കുള്ള പണിയാണ് ജീവിതപങ്കാളിയെ പ്രോഗ്രാമിങ് പഠിപ്പിക്കുന്ന എന്നത്. സംഗതി വലിയ തട്ടുകേടില്ലാതെ ചീറ്റിപോയതുകൊണ്ട് രക്ഷപ്പെട്ടു.
ഈ വാർഷിക പോസ്റ്റ് എഴുതുന്ന പരിപാടിയുടെ രീതി ഒന്ന് മാറ്റാൻ ആലോചനയുണ്ട്. എല്ലാ കൊല്ലവും എഴുതുന്നതിനു പകരം അഞ്ചു കൊല്ലങ്ങൾ കൂടുമ്പോൾ ആയാലോ?
ഏറ്റവും പുതിയ വാർത്ത എന്താണെന്നു വെച്ചാൽ ഇവിടെ അമേരിക്കയിൽ ഒരു വീട് വാങ്ങാനുള്ള പ്ലാൻ ഉണ്ട്. എത്രയെന്നു വെച്ചിട്ടാണ് ഇവിടെ ഒറ്റ ബെഡ് റൂം അപ്പാർട്മെന്റിൽ താമസിക്കുക. എന്തെങ്കിലും വാങ്ങിക്കേണ്ട കാര്യം പറയുമ്പോൾ പിള്ളേർ ഇങ്ങോട്ട് പറഞ്ഞുതുടങ്ങി, നമ്മുടെ വീട്ടിൽ സ്ഥലം ഇല്ലല്ലോ അതുകൊണ്ട് വേണ്ട എന്ന്.വീടിൻ്റെ വിശേഷങ്ങൾ അടുത്ത വർഷം. അപ്പോൾ എല്ലാവർക്കും നന്ദി.
